ⵉⴷⵔⴰ ⵖ ⵜⵉⵏⴰⵡⵜ ⴰⴷ ⵓⴳⴳⴰⵔ ⵏ 24 ⵏ ⵓⵎⵔⵣⵓ ⴷ ⵜⵎⵔⵣⵓⵜ, ⵜⵜⵓⵡⴱⴹⴰⵏ ⵅⴼ ⵚⴹⵉⵚⵜ ⵜⵖⵉⵎⴰ ⵜⵉⵎⴰⵙⵙⴰⵏⵉⵏ, ⵜⴻⵜⵜⵓⵙⴽⴰⵔ ⵜⵉⵖⵉⵎⵉⵜ ⵜⴰⵎⵣⵡⴰⵔⵓⵜ ⴷ ⵖ ⵜⴷⴼⴰⵍⴰ ⵏ ⴱⵕⴰⵀⵉⵎ ⵕⵕⴰⴷⵉ, ⴹⴰⵕⴰⵜ ⵜⵖⵉⵎⵉⵜ ⵏ ⵓⵏⵏⵓⵕⵎ ⵍⵍⵉⵖ ⵣⵔⵉⵏⵜ ⵜⴳⵓⵔⵉ ⵏ ⵜⵙⴷⴰⵡⵉⵜ ⵏ ⵓⵏⴱⴷⵓ ⵍⵍⵉ ⵉⴼⴽⴰ ⵓⵏⵙⵙⵉⵅⴼ ⵏⵏⵙ ⵎⴰⵙⵙ ⵕⴰⵛⵉⴷ ⵍⵃⴰⵃⵉ, ⵜⴹⴼⵓⵕⵏⵜ ⵜⵜ ⴷ ⵜⴳⵓⵔⵉⵡⵉⵏ ⵏ ⵉⵎⵙⵙⵥⵕⴼⵏ ⵏ ⵜⵉⵏⴰⵡⵜ ⴰⴷ ⵖ ⵜⴳⴰ ⵜⵎⵀⵍⴰ ⵜⴰⵏⵎⵏⴰⴹⵜ ⵙⵓⵙ ⵎⴰⵙⵜ ⵏ ⵜⵓⵙⵙⵏⴰ, ⴷ ⵓⵙⵇⵇⵉⵖ ⴰⵖⵉⵡⴰⵏ ⵏ ⵓⴳⴰⴷⵉⵔ ⴷ ⵜⵎⵙⵎⵓⵏⵜ ⵜⵉⵎⵉⵜⴰⵔ.

ⵜⵉⴽⵛⵛⵓⵎⵉⵏ ⵏ ⵜⵖⵉⵎⵉⵜ ⴰⴷ ⵜⴰⵎⴰⵙⵙⴰⵏⵜ ⵜⴰⵎⵣⵡⴰⵔⵓⵜ ⵙⴰⵡⵍⵏⵜ ⵅⴼ ⵓⵙⵏⵜⵍⵜ ⵏ « ⵜⴰⵎⴰⴳⵉⵜ ⵖ ⵢⴰⵏ ⵓⵙⴰⵜⵉ ⴰⵎⵏⵏⴰⵡ », ⵎⵎⴰⵖⵏ ⴳⵉⵙ ⵉⵎⴷⵔⴰⵡⵏ ⴰⴷ ⴼⵙⵉⵏ ⴰⵔⵎⵎⵓⵙ ⵏ ⵜⵎⴰⴳⵉⵜ ⴷ ⵜⵖⴰⵔⴰⵙⵉⵏ ⵜⵉⵎⵏⵏⴰⵡⵉⵏ ⵏ ⵓⵙⵎⵔⵙ ⵏⵏⵙ ⵖ ⵢⵉⵥⵥⵍⵎⴹ ⵏ ⵉⴼⵔⵉⵇⵉⵢⴰ ⵙ ⵓⵎⴰⵜⴰ, ⵙⵙⵏⵜⵉⵏ ⵜⴽⵛⵛⵓⵎⵉⵏ ⵙ ⵜⵉⵏ ⵎⴰⵙⵙⴰ ⴱⴰⵙⵛⵉⵏⴰ ⵙⵉⴱⵢⴰ ⵙⴳ ⵜⵙⴷⴰⵡⵉⵜ ⵏ ⴱⵓⵍ ⴱⴰⵍⵉⵔⵉ : ⵜⵙⴰⵡⵍ ⵅⴼ ⵓⵙⵎⵀⵍ ⴰⴷⵉⵎⵓⴽⵔⴰⵜⵉ ⵖ ⵢⵉⵥⵥⵍⵎⴹ ⵏ ⵉⴼⵉⵇⵉⵢⴰ ⴹⴰⵕⴰⵜ ⵏ ⵓⴱⴰⵢⵢⵓⵕ ⴽⵓⴼⵉⴷ 19, ⵙⵍⴰⵡⴰⵏ ⴰⴽⴽⵯ ⵜⵉⵔⵎⵉⵜ ⵏ ⵜⵓⵏⵙ ⴷ ⴷⵣⴰⵢⵔ.
ⵊⴰⵎⴰⵍ ⴼⵣⵣⴰ, ⵙⴳ ⵜⴰⵙⴷⴰⵡⵉⵜ ⵏ ⵎⵓⵃⵎⵎⴰⴷ ⵡⵉⵙⵙ ⵙⵎⵎⵓⵙ ⵖ ⵕⵕⴱⴰⴹ, ⵉⵙⴽⵔ ⵢⴰⵜ ⵜⵖⵔⵉ ⵖ ⵓⵙⵎⵔⵙ ⵏ ⵓⵔⵎⵎⵓⵙ ⵏ ⵜⵎⴰⴳⵉⵜ ⵖ ⵜⴱⵔⵣⴰ ⵜⴰⴷⵢⵓⵍⵓⵊⵉⵜ, ⵉⴼⴽ ⴽⵔⴰ ⵉⵎⴷⵢⴰⵜⵏ ⵏ ⵎⴰⵏⵎⴽ ⵙ ⵉⵜⵜⵏⴼⴰⵍ ⵓⵏⴰⵎⴽ ⵏ ⵓⵔⵎⵎⵓⵙ ⵜⵏⴼⵍ ⵜⵉⵍⴰⵍⵜ ⵏⵏⵙ ⵙⴳ ⵢⴰⵜ ⵜⴷⵢⵍⵓⵍⵊⵉⵜ ⴰⵔ ⵜⴰⵢⵢⴰⴹ ⵖ ⵜⴽⵛⵛⵓⵎⵜ ⵏⵏⵙ ⵍⵍⵉ ⵎⵓ ⵉⵙⵜⵉ ⴰⵣⵡⴰⵍ ⵏ « ⵜⵉⵍⴰⵍⵜ ⵖⵔ ⵜⵎⴰⵣⵉⴳⵜ, ⵖⵔ ⵢⴰⵏ ⵓⴱⴰⵔⴰⴷⵉⴳⵎ ⴰⵎⴰⵢⵏⵓ ».
ⵎⵓⵃⵎⵎⴰⴷ ⴱⵓⵎⴷⵢⴰⵏ, ⵍⵍⵉ ⵉⵙⴽⵔⵏ ⵢⴰⵏ ⵓⵙⵎⵣⴰⵣⴰⵍ ⵏⴳⵔ ⵜⵎⴰⴳⵉⵜ ⵍⵍⵉ ⵢⴰⴽⴽⴰ ⵓⴼⴳⴰⵏ ⵉ ⵢⵉⵅⴼ ⵏⵏⵙ ⴳ ⵓⵎⴰⴹⴰⵍ ⴰⵎⵓⵟⵟⵓⵏ ⴷ ⵜⵎⴰⴳⵉⵜ ⵏⵏⵙ ⵏ ⵜⵉⴷⵜ ⴳ ⵓⵎⴰⴹⴰⵍ ⵏ ⵜⵉⵍⴰⵡⵜ.
ⵎⴰⵙⵙ ⵍⵃⵙⵏⴰ ⵓⵣⵣⴰⵜ ⵍⵍⵉ ⵉⵙⴽⵔⵏ ⵢⴰⵜ ⵜⵖⵔⵉ ⵏ ⵓⴼⵔⴰⵏ ⵖ ⵜⵓⴳⵜⵜ ⵏ ⵉⵔⵎⵎⵓⵙⵏ ⵍⵍⵉ ⵉⵣⴷⵉⵏ ⴷ ⵜⵎⴰⴳⵉⵜ ⵖ ⵢⵉⵥⵥⵍⵎⴹ ⵏ ⵉⴼⵔⵉⵇⵉⵢⴰ, ⵉⴼⴽ ⴰⵙⵙⴰⵖ ⵍⵍⵉ ⵉⵥⵕⵕⴰ ⵉⴳⴰ ⴰⵎⴷⴷⴰⴷ ⴰ ⵜⵎⴰⵣⵉⵔⵜ ⵏ ⵉⵎⴰⵣⵉⵖⵏ ⵍⵍⵉ ⵜ ⵉⴳⴰⵏ ⴷ « ⵜⴰⵎⴰⵣⵖⴰ ».
ⵎⴰⵙⵙ ⵄⴱⴷⵓⵍⵍⴰⵀ ⵚⴱⵕⵉ ⵉⵙⴰⵡⵍ ⵏⵜⵜⴰ ⵖ ⵜⴽⵛⵛⵓⵎⵜ ⵏⵏⵙ ⵍⵍⵉ ⵎⵓ ⵉⴳⴰ ⵙ ⵡⴰⵙⵙⴰⵖ « ⵜⴰⴷⵍⵙⴰ ⵏ ⵜⴷⵓⵙⵉ ⴷ ⵓⵢⵉⴳⵔ ⵏ ⵓⵙⴳⵏⴰⴼ ⵖ ⵍⵎⵖⵔⵉⴱ ⴰⵜⵔⴰⵔ » ⵢⵉⵡⵉ ⴷ ⴳⵉⵙ ⵎⴰⵙ ⴷ ⵉⵇⵇⴰⵏ ⵉⵎⵙⴳⵏⴰⴼⵏ ⵉⵜⵔⴰⵔⵏ ⴰⴷ ⵓⵔⵔⵉⵏ ⵖⵔⵏ ⵥⵕⵏ ⴰⴳⵯⵎⵏ ⴷ ⵖ ⵜⴷⵍⵙⴰ ⴷ ⵜⵓⵙⵙⵏⴰ ⵜⴰⵇⴱⵓⵔⵜ ⵉⵣⴷⵉⵏ ⴷ ⵉⴳⵔ ⵏ ⵜⴷⵓⵙⵉ ⴷⴰⵔ ⵉⵎⴰⵣⵉⵖⵏ.
ⵖ ⵡⴰⵙⵙ ⵡⵉⵙⵙ ⵙⵉⵏ, 15 ⵢⵓⵍⵢⵓⵣ 2022, ⵜⴻⵜⵜⵓⵙⴽⴰⵔ ⵜⵉⵏⴰⵡⵜ ⵜⴰⵎⴰⵙⵙⴰⵏⵜ ⵏ ⵜⴰⵢⵍⴳⵉ, ⵖ ⵜⴷⴰⵍⴰ ⵏ ⵜⵉⵏⴰⵡⵉⵏ ⵏ ⵓⵙⵏⵙⵓ ⴰⵏⵣⵉ, ⵅⴼ « ⵜⴰⵎⴰⴳⵉⵜ ⴷ ⵜⵎⵏⴹⴰⵡⵉⵏ ⴷ ⵜⴷⵉⵎⵓⴽⵕⴰⵜⵉⵜ », ⵙⴰⵡⵍⵏ ⴳⵉⵙ ⵉⵎⵔⵣⵓⵜⵏ ⵅⴼ ⵓⵔⵎⵎⵓⵙ ⵏ ⵜⵎⴰⴳⵉⵜ ⴳ ⵜⵉⵔⵎⵉⵜⵉⵏ ⵜⵉⴷⵙⵜⴰⵔⵉⵏ ⵏ ⵍⵎⵖⵔⵉⴱ ⵍⵍⵉ ⵙⵎⵙⴰⵣⴰⵍⵏ ⴷ ⵜⵉⵔⵎⵉⵜⵉⵏ ⵜⵉⴷⵙⵜⴰⵔⵉⵏ ⵏ ⵜⵓⴳⵜⵜ ⵏ ⵜⵎⵉⵣⴰⵔ ⵏ ⵉⵥⵥⵍⵎⴷ ⵏ ⵉⴼⵔⵉⵇⵉⵢⴰ, ⵙⴰⵡⵍⵏ ⵅⴼ ⵉⵎⵓⴽⵔⵉⵙⵏ ⵏ ⵓⵙⵙⵏⵚⴱ ⵏ ⵜⵎⴰⴳⵉⵜ ⴳ ⵜⵎⵏⴹⴰⵡⵉⵏ ⴰⴷ
ⵄⴱⴷⵍⴽⵔⵉⵎ ⵍⵃⴹⴰⵢⴳⵉ ⵙⴳ ⵜⴰⵙⴷⴰⵡⵉⵜ ⵏ ⵉⴱⵏⵓ ⵥⵓⵀⵕ ⵖ ⵓⴳⴰⴷⵉⵔ, ⵉⵙⴽⵔ ⵢⴰⵜ ⵜⵖⵔⵉ ⵜⴰⵏⴼⵔⴰⵏⵜ ⵖ ⵜⵖⴰⵔⴰⵙⵜ ⵍⵍⵉ ⵙ ⵢⵉⵡⵉ ⵓⴷⵓⵙⵜⵓⵔ ⴰⵎⵖⵔⵉⴱⵉ ⵜⴰⵎⵏⵜⵉⵍⵜ ⵏ ⵜⵎⴰⴳⵉⵜ ⵙⵍⴰⵡⴰⵏ ⴰⴽⴽⵯ ⵍⵉⵖ ⵉⴳⴰ ⵡⴰⵎⵓⵏ ⴰⵎⵖⵔⵉⴱⵉ ⵢⴰⵏ ⵡⴰⵎⵓⵏ ⴰⵎⵢⴰⵏⴰⵡ.
ⴰⵎⵉⵏ ⵎⴰⵃⴹⵓⴹ, ⵙⴳ ⵜⴰⵙⴷⴰⵡⵉⵜ ⵍⵃⴰⵙ ⴰⵏ ⴰⵎⵣⵡⴰⵔⵓ ⵖ ⵚⵟⵟⴰⵟ, ⵉⵙⴰⵡⵍ ⵅⴼ ⵓⵏⴰⵥⴰⵕ ⴷ ⵡⴰⴷⴷⴰⴷ ⵏ ⵜⵎⴰⴳⵉⵜ ⵜⵓⵥⵍⴰⵢⵜ ⵏ ⵍⵎⵖⵔⵉⴱ ⵖ ⵓⵣⵎⵣ ⵏ ⵜⵙⵎⴰⴹⴰⵍⵜ.
ⵎⵓⵚⵟⴰⴼⴰ ⴱⵓⵊⵄⴱⵓⵟ, ⵙⴳ ⵇⵏⵉⵟⵕⴰ, ⵉⵙⴽⵔ ⵢⴰⵜ ⵜⵖⵔⵉ ⵜⴰⵏⴼⵔⴰⵏⵜ ⵖ ⵜⵎⵏⴹⴰⵡⵉⵏ ⵏ ⵓⴳⴰⴼⴰ ⵏ ⵉⴼⵔⵉⵇⵉⵢⴰ, ⵉⵙⴽⵔ ⵢⴰⵏ ⵓⵙⵎⵣⴰⵣⴰⵍ ⵏⴳⵔ ⵜⴰⵎⵣⴳⵉⵜ ⴳ ⵜⵎⵏⴹⴰⵡⵜ ⵏ ⴷⵣⴰⵢⵔ ⴷ ⵜⵎⵏⴹⴰⵡⵜ ⵏ ⵍⵎⵖⵔⵉⴱ.
ⵜⵉⵖⵉⵎⵉⵜⵏ ⵜⴷⴳⴳⵯⴰⵜ, ⵜⴻⵜⵜⵓⵙⴽⴰⵔ ⴰⵡⴷ ⵏⵜⵜⴰⵜ ⴳ ⵓⵙⵏⵙⵓ ⴰⵏⵣⵉ, ⵜⴻⵜⵜⵓⵥⵍⴰⵢ ⵉ ⵓⵙⵏⵜⵍ ⵏ « ⵜⴰⵎⴰⴳⵉⵜ ⴷ ⵓⵙⴳⴷ ⴷ ⵜⵎⵖⴰⵔⵜ » ⵙⴰⵡⵍⵏ ⴳⵉⵙ ⵉⵎⴷⵔⴰⵡⵏ ⵅⴼ ⵜⵉⵍⴰⵍⵜ ⵏ ⵓⵙⴳⴷ ⵖ=ⴳ ⵜⵣⴷⴰⵢⵜ ⵏⵏⵙ ⴷ ⵜⵎⴰⴳⵉⵜ ⴳ ⵓⵚⴽⵓ ⵏ ⵜⴰⵡⵊⴰ,
ⵢⴰⵙⵉⵏ ⴰⵊⴰⵏⴰ ⵙⴳ ⵜⵙⴷⴰⵡⵉⵜ ⵏ ⵍⵎⵓⵃⵎⵎⴰⴷⵉⵢⵢⴰ, ⵉⵙⴽⵔ ⵢⴰⵜ ⵜⵖⵔⵉ ⵜⴰⵏⴼⵔⴰⵏⵜ ⵖ ⵓⵙⵎⵔⵙ ⵏ ⵜⵎⴰⴳⵉⵜ ⴷⴰⵔ ⵜⵔⵓⴱⴱⴰ ⵜⵉⵏⵙⵍⴰⵎⵉⵏ ⵖ ⵍⵎⵖⵔⵉⴱ ⵖ ⵜⴽⵛⵛⵓⵎⵜ ⵏⵏⵙ ⵍⵍⵉ ⵎⵉ ⵉⵙⵙⴰⵖ « ⵜⵉⵎⴰⴳⵉⵜⵉⵏ ⵜⵉⵏⴰⵎⵓⵏⵉⵏ ⴷ ⵡⴰⴷⴷⴰⴷ ⵉⵜⵜⵢⴰⴳⴰⵍⵏ ⵏ ⵓⴳⵎⴰⵎ ⴰⵙⴳⴷⴰⵏ ».
ⵅⴰⵍⵉⴷ ⵍⵃⵙⵉⴽⴰ ⵙⴳ ⵜⵙⴷⴰⵡⵉⵜ ⵎⵓⵃⵎⵎⴰⴷ ⵡⵉⵙⵙ ⵙⵎⵎⵓⵙ ⵖ ⵕⵕⴱⴰⴹ, ⵉⵙⴽⵔ ⵢⴰⵜ ⵜⵖⵔⵉ ⵖ ⵜⵉⵍⴰⵍⵜ ⵏ ⵜⵎⴰⴳⵉⵜ ⵖ ⵓⵚⴽⴰ ⵏ ⵜⵓⵡⵊⴰ,ⴷ ⵉⵎⵓⴽⵔⵉⵙ ⵍⵍⵉ ⵉⵜⵜⵎⵓⵏⵏ ⴷ ⵜⵎⵙⵔⴰⵢⵜ ⴰⴷ ⵏ ⵜⵎⴰⴳⵉⵜ ⵜⴰⵏⴰⵎⵓⵏⵜ ⵖ ⵓⵣⵎⵣ ⴰⴷ ⵉⵡⴰⵜⵜⵙ ⵜⴰⵏⵎⴰⵏⵜ.
ⵎⴰⵕⴳⴰⵕⵉⵟⴰ ⵕⴰⵥⵓⵍⵓ ⵙⴳ ⵓⵙⵏⴰⴳ ⵉⵏⴰⵍⴽⵓ (INALCO) ⵍⵍⵉ ⵉⵙⴰⵡⵍⵏ ⵅⴼ ⵓⵎⵓⵙⵙⵓ ⴰⵙⴷⵏⴰⵏ ⵖ ⵍⵇⴱⴰⵢⵍ ⵜⵙⴽⵔ ⵢⴰⵜ ⵜⵖⵔⵉ ⵖ ⵜⴰⵏⵏⴰⵢⵜ ⵏ ⵓⵎⵓⵙⵙⵓ ⴰⴷ ⵉ ⵜⵎⴰⴳⵉⵜ ⵏⴳⵔ ⵉⵙⵓⴳⴰⵎ ⵉⴷⵉⵎⵓⴽⵔⴰⵜⵉⵢⵏ ⵉⵎⴰⴹⵍⴰⵏ ⵉⵜⵔⴰⵔⵏ ⴷ ⵉⵜⴰⴳⴳⵏ ⵉⵇⴱⵓⵔⵏ.
ⵖ ⵎⴰ ⵉⵥⵍⵉⵏ ⵙ ⵡⴰⵙⵙ ⵡⵉⵙⵙ ⴽⵕⴰⴹ, 16 ⵢⵓⵍⵢⵓⵣ 2022, ⵜⴻⵜⵜⵓⵥⵍⴰⵢ ⵜⵉⵏⴰⵡⵜ ⵏ ⵜⴰⵢⵍⴳⵉ ⵉ ⵜⵣⴷⴰⵢⵜ ⵏ ⵜⵎⴰⴳⵉⵜ ⴷ ⵜⵙⴽⵍⴰ, ⵜⴻⵜⵜⵓⵙⴽⴰⵔ ⴳⵉⵙ ⵜⵖⵔⵉ ⵖ ⴽⵔⴰ ⵏ ⵜⵉⵔⵎⵉⵜⵉⵏ ⵜⵉⵙⴽⵍⴰⵏⵉⵏ ⵜⵉⵎⵖⵔⵉⴱⵉⵢⵉⵏ ⴷ ⵎⴰⵏⵎⴽ ⵙ ⵏⵏ ⴳⴳⵔⵏⵜ ⵉ ⵓⵙⵏⵜⵍ ⵏ ⵜⵎⴰⴳⵉⵜ, ⵙⵍⴰⵡⴰⵏ ⴰⴽⴽⵯ ⵜⴰⵙⴽⵍⴰ ⵉⵜⵜⵢⵔⴰⵏ ⵙ ⵜⵎⴰⵣⵉⵖⵜ ⴷ ⵜⴼⵔⴰⵏⵙⵉⵜ :
ⵎⵉⵃⵎⵎⴰⴷ ⴰⴽⵓⵏⴰⴹ, ⴰⵎⴰⵔⴰ ⴰⵏⴳⴳⴰⵍ, ⵉⵙⴽⵔ ⵖ ⵜⴽⵛⵛⵓⵎⵜ ⵏⵏⵙ ⵍⵍⵉ ⵎⵉ ⵉⵙⵙⴰⵖ « ⵎⴰⵏⵎⴽ ⵙ ⵉⵜⵜⵓⵎⴰⵏ ⵓⴼⵔⴰⴽ ⵙ ⵜⵎⴰⴳⵉⵜ ⴳ ⵜⵙⴽⵍⴰ » ⵢⴰⵜ ⵜⵖⵔⵉ ⵖ ⴽⵔⴰ ⵓⵎⵏⴰⵏ ⵏ ⵜⵎⴰⴳⵉⵜ ⵖ ⵜⵙⴽⵍⴰ ⵍⵍⵉ ⵓⵔⴰⵏ ⵉⵎⴰⵣⵉⵖⵏ ⵙⵡⴰ ⵡⵉⵍⵍⵉ ⵢⵓⵔⴰⵏ ⵙ ⵜⵎⴰⵣⵉⵖⵜ ⵓⵍⴰ ⵡⵉⵍⵍⵉ ⵙⵉⵙ ⵓⵔ ⵢⵓⵔⵉⵏ ⵎⴰⵛ ⴳⴰⵏ ⵉⵎⴰⵣⵉⵖⵏ ⵉⴼⴽ ⴰⵎⴷⵢⴰ ⵏ ⵓⵎⴰⵔⴰ ⴰⴼⵓⵍⴰⵢ.
ⵎⵓⵕⴰⴷ ⵏⴰⵛⴼ, ⴰⵎⵔⵣⵓ, ⵢⵉⵡⵉ ⴷ ⵖ ⵜⴽⵛⵛⵓⵎⵜ ⵏⵏⵙ ⵢⴰⵜ ⵜⵖⵔⵉ ⵜⴰⵏⴼⵔⴰⵏⵜ ⵉⵙⵏⴼⴰⵍⴰⵍ ⴳⵉⵙ ⵎⴰⵏⵉⴽ ⵙ ⵉⴳⴰ ⵓⵎⵉⵢ ⴰⵎⴰⵣⵉⵖ «Psyché et Amour» ⵜⴰⵎⴰⵜⴰⵔⵜ ⵏ ⵜⵎⴰⴳⵉⵜ ⵜⴰⵙⴽⵍⴰⵏⵜ ⵜⴳⵔⴰⴽⴰⵍⵜ ⵜⴰⵇⴱⵓⵔⵜ.
ⴰⵚⵡⵡⴰⴱ ⵃⴰⴼⵉⴹⴰ, ⵜⴰⵎⵣⵔⴰⵡⵜ ⵜⴰⵎⵔⵣⵓⵜ ⵖ ⵓⴳⴰⴷⵉⵔ, ⵜⵙⴽⵔ ⵢ ⵜ ⵜⵖⵔⵉ ⵜⴰⵏⴼⵔⴰⵏⵜ ⴳ ⵓⵏⴳⵍⴰ ⵏ ⴼⵓⵡⴰⴷ ⵍⵄⵕⵡⵉ « De quel amour blessé » ⵜⵙⵙⵓⴼⵖ ⴷ ⴳⵉⵙ ⴽⵔⴰ ⵏ ⵜⵎⴰⵜⴰⵔⵉⵏ ⵉⵎⵎⴰⵍⴰⵏ ⴰⵣⵣⵉⵡⵣ ⵏ ⵓⵙⵇⵙⵉ ⵏ ⵜⵎⴰⴳⵉⵜ.
ⵜⵉⵏⴰⵡⵜ ⵏ ⵜⴷⴳⴳⵯⴰⵜ ⵏ ⵡⴰⵙⵙ ⴰⴷ, ⵜⵙⵎⴷ ⵏ ⵜⵡⵓⵔⵉ ⵏⵉⵜ ⵏ ⵜⴰⵢⵍⴳⵉ ⵍⵍⵉⵖ ⵜⴻⵜⵜⵓⵥⵍⵉ ⵏⵜⵜⴰⵜ ⵉ ⵓⵙⵏⵜⵍ ⵏ ⵜⵎⴰⴳⵉⵜ ⴷ ⵜⵥⵉⵕⵉⵡⵉⵏ, ⵙⴰⵡⵍⵏ ⴳⵉⵙ ⵉⵎⴷⵔⴰⵡⵏ ⵅⴼ ⵙⵏⴰⵜ ⵜⵉⵔⵎⵉⵜⵉⵏ :
ⵕⴰⵛⵉⴷ ⵉⵙⵉⴽⵙⵉⵡⵉ, ⵙⴳ ⵜⵙⴷⴰⵡⵉ ⵏ ⵍⵇⴰⴹⵉ ⵄⵢⵢⴰⴹ ⵖ ⵎⵓⵕⵕⴰⴽⵯⵛ, ⵉⵙⴽⵔ ⵢⴰⵜ ⵜⵖⵔⵉ ⵜⴰⵏⴼⵔⴰⵏⵜ ⵖ ⵓⵎⵏⴰⵏ ⵏ ⵜⵎⴰⴳⵉⵜ ⵜⵉⵔⵎⵉⵜ ⵏ ⵎⵓⵃⵎⵎⴰⴷ ⵅⴰⵓⵢⵔ ⴷⴷⵉⵏ ⵏⴳⵔ ⵢⴰⵜ ⵜⵎⴰⴳⵉⵜ ⵉⴳⴰⵏ ⵜⴰⵎⴰⴹⵍⴰⵏⵜ ⴷ ⵢⴰⵜ ⵜⵎⴰⴳⵉⵜ ⵉⴳⴰⵏ ⵜⴰⵏⴰⵎⵓⵔⵜ.
ⵓⵢⵙⵙⴰ ⵙⴰⵄⵉⴷ, ⵙⴳ ⵡⵓⵊⴷⴰ, ⵉⵙⴽⵔ ⵢⴰⵜ ⵜⵖⵔⵉ ⴳ ⵉⵏⴰⵡ ⵏ ⵜⵎⴰⴳⵉⵜ ⵖ ⵜⵉⵔⵎⵉⵜ ⵏ ⴱⵉⵏ-ⴱⵉⵏ ⵖ ⵓⵏⴳⴰⵍ ⵏⵏⵙ « Les étoiles de Sidi Moumen » ⵍⵍⵉ ⵅⴼ ⵉⵜⵜⵓⵙⴽⴰⵔ ⵓⵙⴰⵔⵓ ⵏ « Les Chevaux du Die » ⵏ ⵓⵎⵙⵙⵓⴼⵖ ⵏⴰⴱⵉⵍ ⵄⵢⵢⵓⵛ.
ⵜⵉⵖⵉⵎⵉⵜ ⵜⴰⵎⴰⵙⵙⴰⵏⵜ ⵜⵉⵙⵙ ⵚⴹⵉⵚⵜ ⵍⵍⵉ ⵉⵜⵜⵓⵙⴽⴰⵔⵏ ⵜⴰⵢⵍⴳⵉ ⵏ ⵡⴰⵙⵙ ⵏ 17 ⵢⵓⵍⵢⵓⵣ 2022, ⵜⴻⵜⵜⵓⵙⴽⴰⵔ ⵅⴼ ⵓⵙⵏⵜⵍ « ⵜⴰⵎⴰⵣⴳⵉⵜ ⴷ ⵉⵎⵓⵙⵙⵓⵜⵏ ⵉⵏⴰⵎⵓⵏⵏ ⴷ ⵉⵏⵎⵏⴰⵎⴰⵔⵏ » ⵣⵔⵉⵏⵜ ⴳⵉⵙ ⴽⴽⵓⵥⵜ ⵜⴽⵛⵛⵓⵎⵉⵏ :
ⵕⴰⵛⵉⴷ ⵙⵙⴰⵢⵃ, ⵙⴳ ⵜⴰⵙⴷⴰⵡⵉⵜ ⵏ ⵚⵟⵟⴰⵟ, ⵉⵙⴽⵔ ⵢⴰⵜ ⵜⵖⵔⵉ ⵖ ⵜⴼⵔⴽⵉⵡⵉⵏ ⵍⵍⵉⵖ ⴷ ⵉⵣⵔⵉ ⵓⵙⵇⵙⵉ ⵏ ⵜⵎⴰⴳⵉⵜ ⵜⴰⵎⴰⵣⵉⵖⵜ ⵖ ⵍⵎⵖⵔⵉⴱ,
ⴱⵓⵄⵍⵎⴰ ⵎⵓⵃⵎⵎⴰⴷ ⵙⴳ ⵚⵟⵟⴰⵟ, ⵉⵙⴰⵡⵍ ⵖ ⵜⴽⵛⵛⵓⵎⵜ ⵏⵏⵙ ⵅⴼ ⵜⵣⴷⴰⵢⵜ ⵏⴳⵔ ⵜⵎⴰⴳⵉⵜ ⴷ ⵜⵎⵙⴽⵔ ⵜⴰⵏⴰⵎⵓⵏⵜ ⴷ ⵜⵙⵔⵜⴰⵏⵜ
ⵛⵏⵉⴽ ⵛⴰⵢⵎⴰ, ⵜⴰⵎⵣⵔⴰⵡⵜ ⵜⴰⵎⵔⵣⵓⵜ ⵙⴳ ⵕⵕⴱⴰⴹ, ⵜⵙⴽⵔ ⵢⴰⵜ ⵜⵖⵔⵉ ⵖ ⵜⵎⴰⴳⵉⵜ ⵜⴰⵥⵓⵕⴰⵏⵜ ⵏⴳⵔ ⵓⵙⵎⵏⵉⴷ ⵏⵏⵙ ⴰⵥⵓⵕⴰⵏ ⴷ ⵜⵉⵔⵎⵉⵜ ⵜⴰⵙⵔⵜⴰⵏⵜ.
ⵎⴰⴽⵔⴰⵎ ⵙⴽⵔⴰⴼⵉ ⵙⴳ ⵜⵓⵏⵙ, ⵉⵙⴽⵔ ⵢⴰⵜ ⵜⵖⵔⵉ ⵜⴰⵏⴼⵔⴰⵏⵜ ⵖ ⵜⵣⴷⴰⵢⵜ ⵉⵍⵍⴰⵏ ⵏⴳⵔ ⵓⵔⵖⵎⵓⵙ ⵏ ⵜⵎⴰⴳⵉⵜ ⴷ ⵜⵎⵙⴽⵔⵜ ⵜⴰⵙⵔⵜⴰⵏⵜ ⵖ ⵜⵎⴰⵣⵉⵔⵜ ⵏ ⵜⵓⵏⵙ.
ⵖ ⵎⴰ ⵉⵥⵍⵉⵏ ⵙ ⵜⵖⵉⵎⴰ ⵜⵉⵙⴳⵓⵎⴰⵏⵉⵏ, ⵜⴻⵜⵜⵓⵙⴽⴰⵔ ⵜⵎⵣⵡⴰⵔⵓⵜ ⵖ ⵜⴷⴰⵍⴰ ⵏ ⵜⵉⵏⴰⵡⵉⵏ ⵏ ⵓⵙⵏⵙⵓ ⴰⵏⵣⵉ ⵜⴰⴷⴳⴳⵯⴰⵜ ⵏ ⵓⵙⵉⵎⵡⴰⵙ 15 ⵢⵓⵍⵢⵓⵣ 2022, ⵜⴻⵜⵜⵓⵢⵥⵍⴰⵢ ⵉ ⵓⵙⵏⵜⵍ « ⵜⴰⵎⴰⵣⵉⵖⵜ, 30 ⵏ ⵓⵙⴳⴳⵯⴰⵙ ⴹⴰⵕⴰⵜ ⵏ ⵜⵏⵜⵜⴰⵎⵜ ⵏ ⵓⴳⴰⴷⵉⵔ » ⴷⵔⴰⵏⵜ ⴳⵉⵙ ⵜⵥⴰ ⵏ ⵜⵎⵙⵎⵓⵏⵉⵏ ⵏ ⵓⵎⵓⵙⵙⵓ ⴰⵎⴰⵣⵉⵖ, ⵜⴰⵙⴷⴰⵡⵉⵜ ⵏ ⵓⵏⴱⴷⵓ, ⵜⴰⵎⴰⴳⵔⴰⵡⵜ ⵜⴰⵎⴰⵢⵏⵓⵜ, ⵜⴰⵎⵙⵎⵓⵏⵜ ⵜⴰⵎⵖⵔⵉⴱⵉⵜ ⵏ ⵓⵔⵣⵣⵓ ⴷ ⵓⵙⵏⵉⴼⵉⵍ ⴰⴷⵍⵙⴰⵏ (AMREC), ⴰⴽⵓⵏⴳⵉⵔⵉⵙ ⴰⵎⴰⴹⵍⴰⵏ ⴰⵎⵣⵉⵖ (CMA), ⵜⴰⵎⵙⵎⵓⵏⵜ ⴰⵎⵖⴰⵔ ⵅⵏⵉⴼⵔⴰ, ⴰⵥⵟⵟⴰ ⴰⵎⴰⵣⵉⵖ ⵉ ⵜⵏⴰⵎⵓⵔⵜ, ⵜⴰⵎⵙⵎⵓⵏⵜ ⵉⵎⴰⵍ, ⵜⵉⵡⵖⵏⵉ ⴰⵢⵜ ⵄⵍⵉ ⵍⴰⵅⵚⴰⵚ, ⵜⴰⵎⵙⵎⵓⵏⵜ ⴰⵙⵉⴷⴷ ⵎⴽⵏⴰⵙ.
ⵖ ⵜⵖⵉⵎⵉⵜ ⴰⴷ, ⴼⴽⴰⵏ ⵉⵙⴳⴱⴰⵔⵏ ⵏ ⵜⵎⵙⵎⵓⵏⵉⵏ ⴰⴷ ⵜⴰⵏⵏⴰⵢⵉⵏ ⵏ ⵜⵎⵙⵎⵓⵏⵉⵏ ⵏⵏⵙⵏ ⵅⴼ ⵡⴰⴷⴷⴰ ⵏ ⵜⵎⴰⵣⵉⵖⵜ ⴷ ⵓⵎⵓⵙⵙⵓ ⴰⵎⴰⵣⵉⵖ ⴹⴰⵕⴰⵜ ⵏ 30 ⵏ ⵓⵙⴳⴳⵯⴰⵙ ⵅⴼ ⵜⵏⵜⵜⴰⵎⵜ ⵏ ⵓⴳⴰⴷⵉⵔ, ⵎⵙⴰⵙⴰⵏ ⴷ ⴰⴽⴽⵯ ⵎⴰⵙ ⴷ ⵜⴰⵎⴰⵣⵉⵖⵜ ⴰⵙⵙⴰⴷ ⵜⴷⴷⵔ ⵖ ⵢⴰⵏ ⵡⴰⴷⴷⴰⴷ ⵓⵔ ⵉⵙⵙⵓⵙⵎⵏ, ⴹⴰⵕⴰⵜ ⵏ ⵓⵙⵙⵏⵚⴱ ⵏ ⵜⵎⴰⵣⵉⵖⵜ ⵖ ⵜⵎⵏⴹⴰⵡⵜ ⵏ 2011, ⵓⵛⴽⴰⵏ ⴷ ⵉⵙⵍⴳⵏⵏ ⵏ ⵓⵙⵎⵀⵍ ⴱⵍⴰ ⴽⵔⴰ ⵏ ⵜⵢⴰⴼⵓⵜ ⴷⴼⴼⵉⵔ ⵢⴰⵜ ⵜⵉⵣⵉ ⵉⴳⴳⵓⵜⵏ ⵏ ⵓⵜⴰⵜⴰ ⵍⵍⵉ ⵜⵙⵔⴳ ⵜⵏⴱⴰⴹⵜ ⵜⴰⵎⵖⵔⵉⴱⵉⵜ. ⵎⴰⵢⴰⴷ ⵉⵊⵍⴰ ⴽⵉⴳⴰⵏ ⵏ ⵜⵉⵣⵉ ⵉ ⵜⵎⴰⵣⵉⵖⵜ, ⵉⵎⵍ ⵎⴰⵙ ⵓⵔ ⵜⵍⵍⵉ ⵢⴰⵜ ⵜⴰⵏⵏⴰⵢⵜ ⵉⴼⴰⵡⵏ ⴷⴰⵔ ⵜⵏⴱⴰⴹⵜ ⵜⴰⵎⵖⵔⵉⴱⵉⵜ ⴼⴰⴷ ⴰⴷ ⵢⵉⵍⵉ ⵓⵙⵎⵀⵍ ⵏ ⵓⵙⵙⵏⵚⴱ ⵏ ⵜⵎⴰⵣⵉⵖⵜ ⴷ ⵓⵙⵉⴷⴼ ⵏⵏⵙ ⵖ ⵓⵏⴳⵔⴰⵡ ⵏ ⵓⵙⵙⵍⵎⴷ ⴷ ⵓⵙⵎⵓⵜⵜⴳ ⴷ ⵉⴳⵔ ⵏ ⵜⵣⵔⴼⵜ ⴷ ⵜⴳⵔⴰⵡⵉⵏ ⵜⵉⵎⵓⵔⴰⵏⵉⵏ ⴷ ⴽⵓ ⵜⵉⵎⵙⵙⵓⴳⵓⵔⵉⵏ ⵜⵉⴳⴷⵓⴷⴰⵏⵉⵏ, ⵎⴽⵍⵍⵉ ⵙⴰⵡⵍⵏⵜ ⵜⵎⵙⵎⵓⵏⵉⵏ ⴰⴷ ⵅⴼ ⵓⵎⵓⴽⵔⵉⵙ ⵏ ⵜⵓⴽⵙⴰ ⵏ ⵡⴰⴽⴰⵍ ⵏ ⵜⴰⴳⴰⵏⵉⵏ, ⴼⴽⵏⵜ ⵜⴰⵏⵏⴰⵢⵉⵏ ⵏⵏⵙⵏⵜ ⵖ ⵉⵎⴰⵍ ⵏ ⵜⵡⵓⵔⵉ ⵏ ⵓⵎⵓⵙⵙⵓ ⴰⵎⴰⵣⵉⵖ, ⴼⴰⴷ ⴰⴷ ⵣⵔⵉⵏ ⵜⵉⴱⴱⴰⵢⴹⴰⵕⵉⵏ ⴰⴷ ⵉⵍⵍⴰⵏ ⴷⴰⵜ ⵏ ⵜⵎⴰⵉⵖⵜ ⵖ ⵜⵓⴳⵜⵜ ⵉⴳⵔⴰⵏ ⵍⵍⵉ ⵉⵣⴷⵉⵏ ⵉⵣⵔⴼⴰⵏ ⵏ ⵉⵙⵏⵉⵍⵙⵏ ⴷ ⵉⴷⵍⵙⴰⵏⵏ ⴷ ⵉⵏⴰⵎⵓⵏⵏ ⴷ ⵉⴷⵎⵙⴰⵏⵏ, ⴼⴰⴷ ⵜⴻⵜⵜⵓⴼⴽⴰⵏ ⵉⵣⵔⴼⴰⵏ ⵏⵏⵙ ⵉ ⵜⵎⴰⵣⵉⵖⵜ ⵜⵉⵍⵉ ⵖ ⵡⴰⴷⴷⴰⴷ ⵏⵏⵙ ⵍⵍⵉ ⵜⵓⴽⵍⴰⵍ.
ⵜⵉⵖⵉⵎⵉⵜ ⵜⴰⵙⴳⵓⵎⴰⵏⵜ ⵜⵉⵙⵙ ⵙⵏⴰⵜ, ⵜⴻⵜⵜⵓⵥⵍⴰⵢ ⵉ ⵓⵙⵏⵜⵍ « ⵜⴰⵎⴰⴳⵉⵜ ⴷ ⵉⵙⵇⵙⵉⵜⵏ ⵏ ⵜⵍⴻⵍⵍⵉ ⴷ ⵓⵙⵜⵔⴰⵔ ⵖ ⵍⵎⵖⵔⵉⴱ », ⵜⴻⵜⵜⵓⵡⵙⴽⴰⵔ ⵖ ⵜⴷⴰⵍⴰ ⵏ ⴱⵕⴰⵀⵉⵎ ⵕⵕⴰⴹⵉ, ⵉⴷⵔⴰ ⴳⵉⵙ :
ⵃⵎⴰⴷ ⵄⴰⵚⵉⴷ : ⴰⵎⵔⵣⵓ, ⴰⵎⴷⵢⴰⵣ ⴷ ⵓⵎⵏⵄⴰⵕ ⴰⵣⵔⴼⴰⵏ, ⵉⵙⴰⵡⵍ ⵖ ⵜⴽⵛⵛⵓⵎⵜ ⵏⵏⵙ ⵅⴼ ⵜⵣⴷⴰⵢⵜ ⵏⴳⵔ ⵜⵎⴰⴳⵉⵜ ⴷ ⵜⵎⵜⵔⴰⵔⵜ ⴷ ⵓⵙⵜⵔⴰⵔ ⴷ ⵜⴷⵉⵎⵓⴽⵔⴰⵜⵉⵜ, ⴷ ⵉⵎⵓⴽⵔⵉⵙ ⵍⵍⵉ ⵉⵣⴷⵉⵏ ⴷ ⵜⵣⴷⴰⵢⵜ ⴰⴷ ⵖ ⵍⵎⵖⵔⵉⴱ ⴷ ⵜⵎⵉⵣⴰⵔ ⵏ ⵢⵉⵥⵥⵍⵎⴹ ⵏ ⵉⴼⵔⵉⵇⵉⵢⴰ, ⵣⵓⵏ ⴷ ⴰⵎⵓⴽⵔⵉⵙ ⵏ ⵓⵙⵎⵔⴽⵙ ⵏⴳⵔ ⵜⵓⵚⴽⵉⵡⵉⵏ ⵜⵉⵇⴱⵓⵔⵉⵏ ⴷ ⵜⵉⵜⵔⴰⵔⵉⵏ ⴰⵢⵍⵍⵉ ⵢⵓⵊⵊⴰⵏ ⵜⴰⵏⵏⴰⵢⵜ ⴷ ⵉⵎⵏⴰⴷⵏ ⵏ ⵓⵙⵏⵜⵍ ⴰⴷ ⵏ ⵜⵎⴰⴳⵉⵜ, ⵎⵇⵇⴰⵔ ⵜⵍⵍⴰ ⵜⵙⵓⵔⵉⴼⵜ ⵍⵍⵉ ⴷ ⵜⵉⵡⵉ ⵜⵎⵏⴹⴰⵡⵜ ⵏ 2011, ⴰⴷ ⴱⴰⵀⵔⴰ ⵓⵔ ⵉⴼⴰⵡ ⵖ ⵓⴳⵏⵙ ⵏ ⵡⴰⵎⵓⵏ.
ⵅⴰⴷⵉⵊⴰ ⵔⵔⵓⴳⴰⵏⵉ : ⵜⴰⵎⵙⵜⴰⵏⵜ, ⵜⴰⴳⵎⴰⵎⵢⵜ ⵖ ⵓⴳⵔⴰⵡ « ⵕⴰⴱⵉⵄ ⵍⴽⴰⵕⴰⵎⴰ », ⵜⵙⴰⵡⵍ ⵖ ⵜⴽⵛⵓⵎⵜ ⵏⵏⵙ ⵅⴼ ⵓⵙⵇⵙⵉ ⵏ ⵜⵎⴰⴳⵉⵜ ⴷ ⵓⵙⵡⵉⵏⴳⵎ ⴰⵙⴷⵏⴰⵏ, ⵜⴱⴷⵔ ⴷ ⴳⵉⵙ ⵜⵉⵙⵓⵔⵉⴼⵉⵏ ⴷ ⵜⵖⵏⵙⴰ ⵏ ⵓⵎⵓⵙⵙⵓ ⴰⵙⴷⵏⴰⵏ ⴷ ⵓⴷⵉⵎⵓⴽⵔⴰⵜⵉ ⴼⴰⴷ ⴰⴷ ⵢⵉⵍⵉ ⵓⵏⴳⵉⴷⴷⵉ ⵉⵍⵉⵏ ⵉⵣⵔⴼⴰⵏ ⵏ ⵜⵎⵖⴰⵔⵜ ⵙ ⵓⵎⵙⴰⵙⴰ ⴷ ⵢⴰⵜ ⵜⵎⴰⴳⵉⵜ ⵍⵍⵉ ⵔⴰⴷ ⵉⵙⵎⵓⵏ ⴰⵎⵢⴰⵏⴰⵡ ⵏ ⵡⴰⵎⵓⵏⴷ ⵓⵏⵏⵓⵕⵣⵎ ⴼ ⴽⵓⵢⴰⵏ.
ⵄⴱⴷⵍⵡⴰⵀⴰⴱ ⵔⴰⴼⵉⵇⵉ : ⴰⵎⵔⵣⵓ ⵖ ⵢⵉⴳⵔ ⵏ ⵜⵣⵔⴰⵡⵉⵏ ⵜⵉⵏⵙⵍⴰⵎⵉⵏ, ⵍⵍⵉ ⵉⵙⴰⵡⵍⵏ ⵖ ⵜⴽⵛⵛⵓⵎⵜ ⵏⵏⵙ ⵅⴼ ⵜⵣⴷⴰⵢⵜ ⵏⴳⵔ ⵓⵙⵖⴰⵏ ⴷ ⵜⵎⴰⴳⵉⵜ ⵜⴰⵏⴰⵎⵓⵔⵜ, ⵉⵙⵙⴽⵜⵉ ⴷ ⴰⵏⵊⵉⵇⴰⴼ ⵍⵍⵉ ⵉⵍⵍⴰⵏ ⵏⴳⵔ ⵙⵏⴰⵜ ⵜⵙⴳⵉⵡⵉⵏ, ⵜⴰⵎⵣⵡⴰⵔⵓⵜ ⴰⵔ ⵜⵜⵏⵄⴰⵕ ⴼ ⴽⵓ ⵉⴳⵎⴰⵎⵏ ⵏ ⵜⵎⴰⴳⵉⵜ ⵜⴰⵏⴰⵎⵓⵔⵜ, ⴷ ⵢⴰⵜ ⵜⵙⴳⴰ ⵍⵍⵉ ⵉⵜⵜⵏⵄⴰⵕⵏ ⴼ ⵓⵙⵖⴰⵏ ⴰⴷ ⵉⴳ ⵉ ⵡⴰⴹⵓ ⵏⵏⵙ ⵜⴰⵎⴰⴳⵉⵜ ⵜⴰⵏⴰⵎⵓⵔⵜ.
ⵖ ⵜⵉⵏⴰⵡⵜ ⴰⴷ ⵜⵜⵓⵢⵙⴽⴰⵔⵏⵜ ⵜⴽⵛⵛⵓⵎⵉⵏ ⵙ ⴽⴽⵓⵥⵜ ⵜⵓⵜⵍⴰⵢⵉⵏ, ⵜⴰⵎⴰⵣⵉⵖⵜ ⴷ ⵜⵄⵔⴰⴱⵜ ⴷ ⵜⴼⵕⴰⵏⵙⵉⵙⵜ ⴷ ⵜⵏⴳⵍⵉⵣⵜ, ⴷⵔⵓⵏ ⴳⵉⵙ ⵉⵎⵔⵣⵓⵜⵏ ⴷ ⵜⵎⵔⵣⵓⵜⵉⵏ ⵙⴳ ⵚⴹⵉⵚⵜ ⵜⵎⵉⵣⴰⵔ ; ⵍⵎⵖⵔⵉⴱ ⴷ ⴷⵣⴰⵢⵔ ⴷ ⵜⵓⵏⵙ ⴷ ⴼⵕⴰⵏⵙⴰ ⴷ ⵎⵉⵚⵕ ⴷ ⵟⵓⴳⵓ.