ⵜⵉⵏⴰⵡⵜ ⵜⴰⴳⵔⴰⵖⵍⴰⵏⵜ ⵜⵉⵙⵙ 17

ⵜⵉⵏⴰⵡⵜ ⵜⴰⴳⵔⴰⵖⵍⴰⵏⵜ ⵜⵉⵙⵙ 17

tinawt tagraghlant
ⵜⵉⵏⴰⵡⵜ ⵜⴰⴳⵔⴰⵖⵍⴰⵏⵜ ⵜⵉⵙⵙ 17
ⴰⴳⴰⴷⵉⵔ : 20/23 ⵢⵓⵍⵢⵓⵣ 2023
ⵜⴰⵙⵉⵍⴰ ⵏ ⵜⵉⵏⴰⵡⵜ ⵜⴰⴳⵔⴰⵖⵍⴰⵏ
ⴳ ⵜⴳⴰⵔⵉⵡⵉⵏ ⵏ ⵜⴰⵙⵓⵜ ⴰⴷ ⵜⴰⵎⴳⴳⴰⵔⵓⵜ, ⵏⴼⴰⵍⴰⵍⵏ ⴷ ⵜⵓⴳⵜⵜ ⵏ ⵉⵏⵡⴰⵏ ⵏ ⵜⵢⴰⴼⵓⵜⵉⵏ ⴷ ⵜⵓⵜⵔⵉⵡⵉⵏ ⵉⵣⴷⵉⵏ ⴷ ⵜⵎⴰⵣⵉⵖⵜ ⵖ ⵜⵎⵉⵣⴰⵔ ⴷ ⵉⵡⴰⵏⴽⵏ ⵏ ⵢⵉⵥⵥⵍⵎⴹ ⵏ ⵉⴼⵔⵉⵇⵉⵢⴰ, ⵜⴳ 2011 ⵢⴰⵜ ⵜⴼⵔⴽⴰ ⵍⵍⵉ ⵉⵙⵙⵏⴼⵍⵏ ⴽⵉⴳⴰⵏ ⴳ ⵓⵎⵣⵔⵓⵢ ⵏ ⵜⴰⵏⵏⴰⵢⵜ ⴷ ⵜⵎⵙⴽⵔⵜ ⵏ ⵉⵡⴰⵏⴽⵏ ⵎⵏⵉⴷ ⵏ ⵉⵏⴰⵡⵏ ⴰⴷ ⴷ ⵜⵓⵜⵔⵉⵡⵉⵏ ⴰⴷ ⵙⵍⴰⵡⴰⵏ ⴰⴽⴽⵯ ⴳ ⵎⴰⴷ ⵉⵥⵍⵉⵏ ⵙ ⵜⵓⵜⵍⴰⵢⵜ ⴷ ⵜⴷⵍⵙⴰ ⵜⴰⵎⴰⵣⵉⵖⵜ, ⵍⵍⵉⵖ ⵜⴳⴰ ⵜⵓⵜⵔⴰ ⵏ ⵓⵙⵙⵏⵚⴱ ⴰⴷⵙⵜⴰⵔ ⵏ ⵜⵎⴰⵣⵉⵖⵜ ⵢⴰⵜ ⵜⵓⵜⵔⴰ ⵜⴰⵙⵉⵍⴰⵏⵜ ⴷⴰⵔ ⵉⵎⵓⵙⵙⵓⵜⵏ ⵉⵏⵎⵏⴰⵎⴰⵔⵏ ⴷ ⵉⵏⴰⵎⵓⵏⵏ ⵍⵍⵉ ⵉⵣⵔⵉⵏ ⴳ ⵜⵎⵉⵣⴰⵔ ⴰⴷ ⴰⴽⵓⴷ ⴰⵏⵏ. ⴳ ⵍⵎⵖⵔⵉⴱ, ⵉⴳⴰ ⵓⵙⵙⵏⵚⴱ ⴰⴷⵙⵜⴰⵔ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵢⴰⵜ ⵜⵓⵜⵔⴰ ⵉⵏⴼⵍⴰⵍⵏ ⴷⴰⵔ ⵓⵎⵓⵙⵙⵓ ⵏ 20 ⴱⵕⴰⵢⵕ ⴷ ⴷⴰⵔ ⴰⵢⵜ ⵓⵎⵓⵙⵙⵓ ⴰⵎⴰⵣⵉⵖ, ⵎⴽ ⴰⵏⵏ ⴷ ⵉⴳⵔⴰⵡⵍⵉⵢⵏ ⵏ ⵍⵉⴱⵢⴰ, ⵍⵍⵉⵖ ⵜⵜⵔⵏ ⵉⵍⵉⵏⵉⵢⵏ ⴰⴷ ⵢⵉⵍⵉ ⵓⵓⵙⵏⵚⴱ ⵏ ⵜⵓⵜⵍⴰⵢⵜ ⴷ ⵜⵎⴰⴳⵉⵜ ⵜⴰⵎⴰⵣⵉⵖⵜ ⴷ ⵓⵙⵉⴷⴼ ⵏⵏⵙ ⵖⵔ ⵓⴷⵓⵙⵜⵓⵔ, ⴳ ⵜⵓⵏⵙ ⵜⴻⵜⵜⵡⴰⵢⵙⴽⴰⵔ ⵜⵎⵙⵎⵓⵏⵜ ⵜⴰⵜⵓⵏⵙⵉⵜ ⵉ ⵜⴷⵍⵙⴰ ⵜⴰⵎⴰⵣⵉⵖⵜ, ⴰⵔ ⵜⵙⵙⵓⵜⵓⵔ ⴰⴷ ⵢⵉⵍⵉ ⵓⵙⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵖ ⵜⵉⵏⵎⴰⵍ ⴷ ⵓⵙⵙⵉⵖⵥⵏ ⵏ ⵜⴷⵍⵙⴰ ⵜⴰⵎⴰⵣⵉⵖⵜ ⵎⴰ ⵙ ⵜⴳⴰ ⵙⴳ ⵜⴷⵍⵙⴰ ⵜⴰⵜⵓⵏⵙⵉⵜ, ⵖ ⴷⴷⵣⴰⵢⵔ, ⵏⴼⴰⵍⴰⵍⵏⵜ ⴷ ⴷⴰⵖ ⵜⵓⵜⵔⵉⵡⵉⵏ ⵏ ⵓⵎⵓⵙⵙⵓ ⴰⵎⴰⵣⵉⵖ ⵖ ⵓⵎⵓⵙⵙⵓ ⵏ 2019, ⵜⴰⵎⵥ ⵢⴰⵏ ⵓⴱⵔⵉⴷ ⴰⵙⵔⵜⴰⵏ ⵎⵇⵇⵓⵔⵏ, ⴰⴳⵯⵏⵙ ⵏ ⵜⵎⴰⵣⵉⵔⵜ ⴷ ⴱⵕⵕⴰ ⵏⵏⵙ, ⴳ ⵜⵎⵉⵣⴰⵔ ⵏ ⵢⵉⴼⴼⵓⵙ ⵏ ⵜⵏⵣⵔⵓⴼⵜ ⵍⵍⵉ ⵖ ⵍⵍⴰⵏ ⴽⵔⴰ ⵡⴰⴷⴷⴰⴷⵏ ⵍⵍⵉ ⵏⴰⵃⵢⴰ, ⵍⵍⵉⵖ ⵜⵓⵙⵉ ⵜⵓⵜⵔⴰ ⵜⴰⴷⵍⵙⴰⵏ ⴷ ⵜⵉⵏ ⵜⵎⴰⴳⵉⵜ ⵢⴰⵜ ⵜⵡⵉⵍⴰ ⵜⴰⵙⵔⵜⴰⵏⵜ ⵙⴳ ⵜⵉⵣⵡⵉⵔⵉ ⵏⵏⵙ, ⵎⴽ ⴰⴷ ⴰⴷ ⵉⵏⴼⴰⵍⴰⵍⵏ ⴳ ⵓⵎⵓⵙⵙⵓ ⵏ ⵓⵥⴰⵡⴰⴹ ⴷ ⵉⵙⵏⴼⵍⵏ ⵏ ⵉⵎⵉⵖⵏ ⴳ ⵜⵎⴰⵣⵔⵉⵜ ⵏ ⵏⵏⵉⵊⵉⵔ ⴷ ⵎⴰⵍⵉ.
ⵜⵓⵜⵔⵉⵡⵉⵏ ⴰⴷ ⴷ ⵉⵎⵓⵙⵙⵓⵜⵏ ⴰⴷ, ⴼⵍⵏ ⴷ ⵜⵉⵎⵙⴽⵔⵉⵏ ⵎⵣⵔⴰⵢⵏⵉⵏ ⴷⴰⵔ ⵉⵡⴰⵏⴽⵏ ⵏ ⵜⵉⵎⵣⴰⵔ ⴰⴷ, ⴳ ⵍⵎⵖⵔⵉⵏ ⵉⵡⵉⵏ ⴷ ⴰⵙⵙⵏⵚⴱ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⴷ ⵓⵙⵉⵙⵙⵏ ⵎⴰ ⵙ ⵜⴳⴰ ⴰⴼⴷⵉⵙ ⴰⵙⵉⵍⴰⵏ ⴳⵔ ⵉⴼⵔⴷⵉⵙⵏ ⵏ ⵜⴷⵍⵙⴰ ⴷ ⵜⵎⴰⴳⵉⵜ ⵜⴰⵎⵖⵔⵉⴱⵉⵜ ⴳ ⵓⴷⵓⵙⵜⵓⵔ ⵏ 2011, ⵎⴽⵍⵍⵉ ⵉⵍⵍⴰ ⵓⵙⵙⵏⵚⴱ ⵏⵏⵙ ⵎⴰ ⵙ ⵜⴳⴰ ⵜⵓⵜⵍⴰⵢⵜ ⵜⵓⵏⵚⵉⴱⵜ ⴷ ⵜⵏⴰⵎⵓⵔⵜ ⴳ ⵓⴷⵓⵙⵜⵓⵔ ⵏ ⴷⴷⵣⴰⵢⵔ ⵏ ⵓⵙⵙⴳⴳⵯⴰⵙ ⵏ 2016, ⴷ ⵓⴷⵓⵙⵜⵓⵔ ⵏ 2020 ⵓⵍⴰ ⵏⵜⵜⴰ ⵍⵍⵉ ⴷ ⵢⵉⵡⵉⵏ ⴰⴷ ⵉⵜⵜⵓⵙⴽⴰⵔ ⵓⵙⴳⵔⴰⵡ ⴰⴷⵣⴰⵢⵔⵉ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ. ⴳ ⵍⵉⴱⵢⴰ, ⵢⵉⵡⵉ ⴷ ⵓⴷⵓⵙⵜⵓⵓⵔ ⴰⵍⵉⴱⵉ ⵏ 2011, ⵍⵍⵉ ⵉⵏⴼⵍⵏ ⴳ 2012, ⵜⵉⴽⴽⵍⵜⵔ ⵜⴰⵎⵣⵡⴰⵓⵔⵜ, ⴰⵃⵟⵟⵓ ⵏ ⵉⵣⵔⴼⴰⵏ ⵉⵙⵏⵉⵍⵙⵏ ⴷ ⵉⴷⵍⵙⴰⵏⵏ ⵏ ⵉⵎⴰⵣⵉⵖⵏ, ⵎⵉⵏ ⴰⴷ ⵢⵉⵍⵉ ⵓⵙⵙⵏⵚⴱ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⴰⵢⵍⵍⵉ ⵢⵓⴷⵊⴰⵏ ⴰⵙⵇⵇⵉⵎ ⴰⵎⴰⵜⴰⵢ ⵏ ⵉⵎⴰⵣⵉⵖⵏ ⵏ ⵍⵉⴱⵢⴰ ⴰⴷ ⴷ ⵉⵙⵙⵓⴼⵖ ⵢⴰⵜ ⵜⵖⵜⴰⵙⵜ ⵍⵍⵉ ⵔⴰⴷ ⵉⵙⵙⵏⵚⴱ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵙⴳ 2017. ⴳ ⵜⵓⵏⵙ, ⵎⴳⴰⵍ ⵏ ⵜⵉⵔⵎⵉⵜⵉⵏ ⴰⴷ ⴰⴽⴽⵯ, ⵉⵙⵓⵍ ⵓⵙⵉⵜⵜⵉ ⵏ ⵜⵎⴰⵣⵉⵖⵜ ⴳ ⵉⴷⵓⵙⵜⵓⵔⵏ ⵏ ⴹⴰⵕⵜ 2011, ⴰⵎⵎⴰ ⵎⵉⵚⵕ, ⵓⵔ ⵢⴰⴷⵍⵍⵉ ⴳⵉⵙ ⵉⵍⵍⴰ ⵢⴰⵏ ⵓⵎⵓⵙⵙⵓ ⴰⵎⴰⵣⵉⵖ ⵣⵓⵏⴷ ⵡⴰⵍⵍⵉ ⵉⵍⵍⴰⵏ ⴳ ⵜⵎⵉⵣⴰⵔ ⵢⴰⴹⵏⵉⵏ ⵏ ⵢⵉⵥⵥⵍⵎⴹ ⵏ ⴼⵔⵉⵇⵉⵢⴰ, ⵎⴰⵛ ⵎⵇⵇⴰⵔ ⵎⴽ ⴰⵏⵏ ⵍⵍⴰⵏⵜ ⵜⵓⵜⵔⵉⵡⵉⵏ ⴼⴰⴷ ⴰⴷ ⵢⵉⵍⵉ ⵓⵙⵉⵙⵙⵏ ⵏ ⵜⵎⴰⵣⵉⵖⵜ, ⵎⵇⵇⴰⵔ ⴳⴰⵏⵜ ⵜⵉⵙⵏⵜⴰⵢ ⵜⵓⴼⵔⵉⴷⵉⵏ, ⵢⵓⵛⴽⴰ ⴷ ⵓⴷⵓⵙⵜⵓⵔ ⴰⵎⵉⵚⵕⵉ ⴰⵙⴳⴳⵯⴰⵙ ⵏ 2014, ⵍⵍⵉ ⵉⵏⴼⵍⵏ ⴰⵙⴳⴳⵯⴰⵙ ⵏ 2019, ⵎⵉⵏ ⴽⵔⴰ ⵏ ⵜⵖⴰⵡⵙⴰ ⵉⵣⴷⵉⵏ ⵏ ⵜⵓⵜⵍⴰⵢⵜ ⴷ ⵜⴷⵍⵙⴰ ⵜⴰⵎⴰⵣⵉⵖⵜ.
ⵜⵎⵢⴰⵖⵉⵏ ⴰⴷ ⴷ ⵜⵖⴰⵔⴰⵙⵉⵏ ⴰⴷ ⵏ ⵓⵎⴰⵙⴰⵍⵏ ⵉⵡⵉⵏⵜ ⴷ ⴽⵉⴳⴰⵏ ⵏ ⵉⵙⵏⴼⵍⵏ ⴳ ⵉⵏⴰⵡⵏ ⴷ ⵜⵓⵚⴽⵉⵡⵉⵏ ⵏ ⵉⵎⵓⵙⵙⵓⵜⵏ ⵉⵎⴰⵣⵉⵖⵏ ⵖ ⵢⵉⵥⵥⵍⵎⴹ ⵏ ⵉⴼⵔⵉⵇⵉⵢⴰ, ⴳ ⵍⵎⵖⵔⵉⴱ, ⵢⵉⵡⵉ ⵜⵜ ⵓⵎⵓⵙⵙⵓ ⴰⵎⴰⵣⵉⵖ ⵖ ⵓⵙⵎⵀⵍ ⵏ ⵡⴰⴷⴷⴰⴷ ⵓⵏⵚⵉⴱ ⵏ ⵜⵎⴰⵣⵉⵖⵜ ⵖ ⴽⵓ ⵜⵉⵙⴳⵉⵡⵉⵏ ⵏ ⵜⵓⴷⵔⵜ ⵜⴰⵎⴰⵜⴰⵢⵜ ⴷ ⵜⵎⵙⵙⵓⴳⵓⵔⵉⵏ, ⴷ ⵓⵙⵜⴰⵍ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵏ ⵓⵡⴰⵏⴽ ⴳ ⵢⵉⴳⵔ ⵏ ⵓⵙⵙⵍⵎⴷ ⴷ ⵓⵙⵏⵖⵎⵙ, ⵎⴽⵍⵍⵉ ⴷ ⵉⵏⴼⵍⴰⵍ ⵓⴰⵏ ⵢⵉⵏⴰⵡ ⵉⵚⴽⴰⵏ ⵅⴼ ⵓⵣⵔⴼ ⴳ ⵜⴳⵎⵉ ⴷ ⵉⴽⴰⵍⵉⵡⵏ ⴷ ⵉⵙⴰⴳⵎⵏ ⵉⴳⴰⵎⴰⵏⵏ. ⵎⴽⵍⵍⵉ ⴷ ⵏⴼⴰⵍⴰⵍⵏⵜ ⴰⵡⴷ ⴽⵔⴰ ⵏ ⵜⵙⵏⵜⴰⵢ ⵜⵉⵙⵔⵜⴰⵏⵉⵏ, ⴳ ⴷⴷⵣⴰⵢⵔ, ⵙⵓⵍⵏⵜ ⵜⵓⵜⵔⵉⵡⵉⵏ ⵉⵣⴷⵉⵏ ⴷ ⵓⵙⴱⵣⵣⵉⵣⵣ ⵏ ⵓⵙⵙⵍⵎⴷ ⵏ ⵜⵎⴰⵣⵉⵖⵜ, ⴷ ⵓⵙⵎⵀⵍ ⵏ ⵡⴰⴷⴷⴰⴷ ⵏⵏⵙ ⵓⵏⵚⵉⴱ, ⵎⴽⵍⵍⵉ ⵉⴽⴽⴰ ⵓⴱⵔⵉⴷ ⴰⵙⵔⵜⴰⵏ ⵅⴼ ⵓⵎⵙⴳⴷⴰⵍ ⴷ ⵜⵓⵜⵔⴰ ⵜⴰⵎⴰⵣⵉⵖⵜ ⴳ ⵜⵎⴰⵣⵉⵔⵜ ⵓⵍⴰ ⴱⵕⵕⴰ ⵏⵏⵙ.
ⴰⵎⵣⴰⵔⴰⵢ ⵉⵍⵍⴰⵏ ⵏⴳⵔ ⵜⵓⵜⵔⵉⵡⵉⵏ ⵏ ⵉⵎⵓⵙⵙⵓⵜⵏ ⵉⵎⴰⵣⵉⵖⵏ ⴳ ⵢⵉⵥⵥⵍⵎⴹ ⵏ ⵉⴼⵔⵉⵇⵉⵢⴰ ⴰⵔ ⵉⵎⵎⴰⵍ ⴰⵢⵍⵍⵉ ⵉⵜⵜⵉⵢⵙⴽⴰⵔⵏ ⵉ ⵜⵎⴰⵣⵉⵖⵜ ⴰⴳⵯⵏⵙ ⵏ ⴽⵓ ⵜⴰⵎⴰⵣⵉⵔⵜ ⵡⴰⵃⴷⵓ ⵜⵜ, ⵎⵇⵇⴰⵔ ⵉⵜⵜⵉⵢⵙⴽⴰⵔ ⵉⵎⵉⴽⴽ, ⵢⵉⵍⵉ ⵉⵎⵉⴽⴽ ⵏ ⵓⴱⵓⵖⵍⵓ ⴷ ⵓⵣⵣⵉⴳⵣ ⵙ ⴷⴰⵜ ⴳ ⵓⴱⵔⵉⴷ ⵏ ⵓⵙⵉⵙⵙⵏ ⵙ ⵜⵎⴰⵣⵉⵖⵜ ⴳ ⵜⵎⵉⵣⴰⵔ ⵏ ⵢⵉⵥⵥⵍⵎⴹ ⵏ ⵉⴼⵔⵉⵇⵉⵢⴰ, ⵍⵍⴰⵏⵜ ⵜⵓⴳⵜⵜ ⵏ ⵜⵣⵔⴰⵡⵉⵏ ⴰⵔ ⵜⵜⵉⵏⵉⵏⵜ ⵎⴰ ⵙ ⴰⵔ ⵜⴻⵜⵜⵓⵔⵔⵉⵢ ⵜⵎⴰⵣⵉⵖⵜ ⵙ ⴹⴰⵕⴰⵜ ⴰⵔ ⵜⴻⵜⵜⵉⴷⵔⵓⵙ ⵜⵉⵍⴰⵍⵜ ⵏⵏⵙ ⴰⴳⵯⵏⵙ ⵏ ⵡⴰⵎⵓⵏⵏ, ⵍⵍⵉ ⵖ ⵜⵜ ⵉⴳⴰ ⵓⵏⵇⵇⵉⵙ ⵏ ⵜⵎⴰⴷⴷⴰⵙⵜ ⵢⵓⵏⵉⵙⴽⵓ ⴳⵔ ⵜⵓⵜⵍⴰⵢⵉⵏ ⵍⵍⵉ ⵏⵏ ⵢⴰⵥⵏ ⴰⴷ ⵜ ⵜⵏⵖⵓⴱⵓ, ⵎⴽⵍⵍⵉ ⵍⵍⴰⵏⵜ ⵜⵓⴳⵜⵜ ⵏ ⵉⵙⵏⵎⴽⵜⴰⵜⵏ ⵓⵏⵚⵉⴱⵏ ⴰⵔ ⵜⵜⵉⵏⵉⵏ ⵉⵙ ⴷ ⵡⵉⵍⵍⵉ ⵉⵙⴰⵡⴰⵍⵏ ⵜⴰⵎⴰⵣⵉⵖⵜ ⴽⵔⴰ ⵙ ⴰⵔ ⵜⵜⴽⴽⴰⵏ ⴰⵔ ⵜⵜⵉⴷⵔⵓⵙⵏ ⴳ ⵜⵎⵉⵣⴰⵔ ⵏ ⵢⵉⵥⵥⵍⵎⴹ ⵏ ⵉⴼⵔⵉⵇⵉⵢⴰ, ⴰⴷⴷⴰⴷⵏ ⴰⴷ, ⴷ ⵓⵎⵍⴰⵏ ⴰⴷ ⴰⵔ ⴰⵖ ⵜⵜⴰⴷⵊⴰⵏ ⴰⴷ ⵏⵙⵔⵙ ⵜⵓⴳⵜⵜ ⵏ ⵉⵙⵇⵙⵉⵜⵏ :
ⵉⵙ ⵢⵓⴷⴰ ⵓⵙⵙⵏⵚⴱ ⵏ ⵜⵓⵜⵍⴰⵢⵜ ⴷ ⵜⴷⵍⵙⴰ ⵜⴰⵎⴰⵣⵉⵖⵜ ⵉ ⵓⵃⵟⵟⵓ ⵏⵏⵙ ? ⴷ ⵓⵙⵉⵜⵜⴳ ⵏⵏⵙ ? ⵎⵏⵛⴽ ⴰⴷ ⵙ ⵉⵜⵜⵓⵢⵙⴽⴰⵔ ⵓⵙⵎⵀⵍ ⵏ ⵡⴰⴷⴷⴰⴷ ⵓⵏⵚⵉⴱ ⵏ ⵜⵎⴰⵣⵉⵖⵜ ⴷⴰⵔ ⵜⵏⴱⴰⴹⵉⵉⵏ ? ⴷ ⵎⴰⵏ ⵉⵙⵓⴷⴰⴼ ⴷ ⵜⵖⴰⵔⴰⵙⵉⵏ ⵍⵍⵉ ⴷ ⵉⵇⵇⴰⵏⵏ ⴼⴰⴷ ⴰⴷ ⵉⵍⵉⵏⵜ ⵜⴷⵉⵏⴰⵎⵉⵜⵉⵏ ⵜⵉⵏⴰⵎⵓⵏⵉⵏ ⵍⵍⵉ ⵔⴰⴷ ⵜⴰⵎⴰⵣⵉⵖⵜ ⴰⴷ ⵜⵙⵓⵍ ⵜⴱⵓⵖⵍⵓ ⴳ ⵜⵎⵉⵣⴰⵔ ⴷ ⵉⵡⴰⵏⴽⵏ ⵏ ⵢⵉⵥⵥⵍⵎⴹ ⵏ ⵉⴼⵔⵉⵇⵉⵢⴰ ?
ⵎⴰⵏⵉⴽ ⵙ ⵣⵣⵉⴳⵉⵣⵏ ⵉⵎⵓⵙⵙⵓⵜⵏ ⵉⵎⴰⵣⵉⵖⵏ ⴹⴰⵕⵜ ⵏ ⵓⵙⴳⴳⵯⴰⵙ ⵏ 2011 ? ⵎⴰⵏⵉⴽ ⵙ ⵏⵥⴹⴰⵕ ⴰⴷ ⴱⵙⵜⵍ ⵜⴰⵡⵓⵔⵉ ⵏ ⵉⴳⵎⴰⵎⵏ ⵏⵏⵙⵏ ⴷ ⵉⵏⴰⵡ ⵏⵏⵙⵏ ⴷ ⵜⵢⴰⴼⵓⵜⵉⵏ ⵏ ⵜⵡⵓⵔⵉ ⵏⵏⵙⵏ ⵖ ⵙⵉⵎⵔⴰⵡ ⵏ ⵉⵙⴳⴳⵯⴰⵙⵏ ⴰⴷ ⵣⵔⵉⵏⵉⵏ ?
ⵎⴰⵏ ⴰⴷⴷⴰⴷ ⵖ ⵜⵍⵍⴰ ⵜⵓⵜⵍⴰⵢⵜ ⴷ ⵜⴷⵍⵙⴰ ⵜⴰⵎⴰⵣⵉⵖⵜ ⴰⵙⵙ ⴰⴷ ⴳ ⵜⵎⵉⵣⴰⵔ ⵏ ⵢⵉⵥⵥⵍⵎⴹ ⵏ ⵉⴼⵔⵉⵇⵉⵢⴰ ? ⵎⴰⵏ ⴰⵙⵡⵉⵔ ⴳ ⵉⵍⵍⴰ ⵓⵙⵎⵔⵙ ⵏⵏⵙ ⴷ ⵜⵥⵕⵉⴳⵉⵏ ⵏⵏⵙ ⴷ ⵜⵣⵎⵔⵜ ⵏⵏⵙ ⵅⴼ ⵜⴰⵙⵓⵍⵜ ⴷ ⵓⴱⵓⵖⵍⵓ ⴷ ⵜⵖⵏⵏⴰⵏⵜ ? ⴷ ⵎⴰⴷ ⴳⴰⵏⵜ ⵜⵢⴰⴼⵓⵜⵉⵏ ⴷ ⵉⵙⵡⵉⵔⵏ ⴷ ⵜⵖⴰⵔⴰⵙⵉⵏ ⵏ ⵓⵙⵙⵔⵙⵍ ⵏⵏⵙ ⵍⵍⵉ ⵉⵙⵙⵏⵜⵉⵏ ⵖ ⵙⵉⵎⵔⴰⵡ ⵏ ⵉⵙⴳⴳⵯⴰⵙⵏ ⴰⴷ ⴳⴳⵯⵔⴰⵏⵉⵏ, ⵙⵍⴰⵡⴰⵏ ⴰⴽⴽⵯ ⵖ ⵎⴰ ⵉⵥⵍⵉⵏ ⵙ ⵓⵙⵎⵙⴰⵙⴰ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵓⵙⵉⴷⴼ ⵏⵏⵙ ⵖⵔ ⵓⵙⵙⵍⵎⴷ ⴷ ⵓⵙⵏⵖⵎⵙ, ⴷ ⵉⴳⵔⴰⵏ ⵏ ⵜⴷⵍⵙⴰ ⴷ ⵜⵙⴽⵍⴰ ⴷ ⵜⵥⵓⵕⵉ ?
ⴼⴰⴷ ⴰⴷ ⵏⵎⵙⴳⴷⴰⵍ ⵅⴼ ⵉⵙⵇⵙⵉⵜⵏ ⴰⴷ ⴷ ⵡⵉⵢⵢⴰⴹ, ⵔⴰⴷ ⵏⵙⵓⵔ ⵅⴼ ⵉⵙⴳⵓⵎⵏ ⴰⴷ :
1. ⴰⵙⴳⵓⵎ ⴰⵎⵣⵡⴰⵔⵓ : ⵉⵎⵓⵙⵙⵓⵜⵏ ⵉⵎⴰⵣⵉⵖⵏ ⴳ ⵢⵉⵥⵥⵍⵎⴹ ⵏ ⵉⴼⵔⵉⵇⵉⵢⴰ : ⵜⵉⵣⵔⴰⵡⵉⵏ ⴳ ⵜⵓⵚⴽⴰ ⴷ ⵜⵖⴰⵔⴰⵙⵉⵏ ⴷ ⵢⵉⵏⴰⵡ.
2. ⴰⵙⴳⵓⵎ ⵡⵉⵙⵙ ⵙⵉⵏ : ⴰⵎⴰⵙⴰⵍ ⵏ ⵉⵡⴰⵏⴽⵏ ⴷ ⵉⴽⴰⴱⴰⵕⵏ ⵉⵙⵔⵜⴰⵏⵏ ⴷ ⵉⵎⵓⵙⵙⵓⵜⵏ ⵉⵏⴰⵎⵓⵏⵏ ⴷ ⵉⵙⵔⵜⴰⵏⵏ ⴷ ⵜⵎⴰⵣⵉⵖⵜ.
3. ⴰⵙⴳⵓⵎ ⵡⵉⵙⵙ ⴽⵕⴰⴹ : ⴰⵙⵙⵏⵚⴱ ⴰⴷⵙⵜⴰⵔ ⵏ ⵜⵎⴰⵣⵉⵖⵜ ⵜⵓⵜⵍⴰⵢⵜ ⴷ ⵜⴷⵍⵙⴰ, ⴷ ⵓⵙⵎⵀⵍ ⵓⵍⴳⵉⵏ ⴷ ⵓⵎⵔⵙⴰⵍ ⵏ ⵡⴰⴷⴷⴰⴷ ⵓⵏⵚⵉⴱ ⴳ ⵓⵙⵙⵍⵎⴷ ⴷ ⵓⵙⵏⵖⵎⵙ ⴷ ⵜⵎⵙⵙⵓⴳⵓⵔⵉⵏ ⴷ ⴽⵓ ⵜⵉⵙⴳⵉⵡⵉⵏ ⵜⵓⴷⵔⵜ ⵜⴰⵎⴰⵜⴰⵢⵜ.
4. ⴰⵙⴳⵓⵎ ⵡⵉⵙⵙ ⴽⴽⵓⵥ : ⴰⴼⴰⵔⵙ ⴰⴷⵍⵙⴰⵏ ⴷ ⵓⵙⴽⵍⴰⵏ ⴷ ⵓⵥⵓⵕⴰⵏ, ⴷ ⵜⵉⵍⴰⵍⵜ ⵏⵏⵙ ⴳ ⵓⵃⵟⵟⵓ ⵏ ⵜⵓⵜⵍⴰⵢⵜ ⴷ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴷ ⵓⵙⴱⵓⵖⵍⵓ ⵏⵏⵙ.
ⵉⵙⴰⴽⵓⴷⵏ :
• ⵜⵉⵣⵉ ⵏ ⵜⵉⵏⴰⵡⵜ ⵜⴰⴳⵔⴰⵖⵍⴰⵏⵜ : 20-23 ⵢⵓⵍⵢⵓⵣ 2023.
• ⴰⵙⴰⴽⵓⴷ ⵉⴳⴳⵡⵔⴰⵏ ⵉ ⵓⵙⵙⵉⴼⴹ ⵏ ⵉⵙⴳⵣⵍⵏ : 10 ⵢⵓⵏⵢⵓ 2023. ⴰⴷ ⴳⵉⵙⵏ ⵢⵉⵍⵉ : ⵜⴰⵎⵓⴽⵔⵉⵙⵜ ⵏ ⵓⵔⵣⵣⵓ, ⵜⴰⵎⵉⵜⵓⴹⵓⵍⵓⵊⵉⵜ, ⵜⴰⴱⵉⴱⵍⵢⵓⴳⵕⴰⴼⵉⵜ …. ⵏⴳⵔ 300 ⴷ 500 ⵏ ⵜⴳⵓⵔⵉ.
• ⵜⵉⵢⴰⴼⵓⵜⵉⵏ ⵏ ⵓⵙⵜⴰⵍ : 15 ⵢⵓⵏⵢⵓ 2023.
• ⴰⵙⴰⴽⵓⴷ ⵉⴳⴳⵯⵔⴰⵏ ⵉ ⵓⵙⵙⵉⴼⴹ ⵏ ⵜⵣⵔⴰⵡⵜ ⵉⵙⵎⴷⵏ : 05 ⵢⵓⵍⵢⵓⵣ 2023.
ⵉⵇⵇⴰⵏ ⴷ ⴰⴷ ⴳⵉⵏⵜ ⵜⴳⵓⵔⵉⵡⵉⵏ ⵏ ⴽⵓ ⵜⴰⵣⵔⴰⵡⵜ ⵎⴰ ⵉⵜⵜⴳⴳⴰⵏ ⵏⴳⵔ 2000 ⴰⵔ 4000 ⵏ ⵜⴳⵓⵔⵉ, ⵜⵉⵍⵍⵉ ⵉⵜⵜⵢⴰⵔⴰⵏ ⵙ ⵜⵓⵜⵍⴰⵢⵜ ⵜⴰⵄⵕⴰⴱⵜ ⴰⴷ ⵙⵎⵔⵙⵏⵜ ⴰⵙⴽⴽⵉⵍ Sakkal Majalla ⴰⵙⴰⵢ ⵏ 14, ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵙ ⵜⴼⵉⵏⴰⵖ ⴰⴷ ⵉⵜⵜⵓⵙⵎⵔⴰⵙ ⵓⵙⴽⴽⵉⵍ amanar, ⵜⵓⵜⵍⴰⵢⵉⵏ ⵢⴰⴹⵏⵉ ⴰⴷ ⵉⵜⵜⵓⵙⵎⵔⴰⵙ ⵓⵙⴽⴽⵉⵍ TimesNew Roman, ⴷ ⴰⴷ ⵙⵙⵓⴼⵓⵏⵜ ⵜⵉⴼⴰⴷⵉⵡⵉⵏ ⵜⵉⵎⴰⵙⵙⴰⵏⵉⵏ ⵏ ⵜⵉⵔⵔⴰ ⵏ ⵜⵣⵔⴰⵡⵜ ⵖ ⴳⴰⵏ ⵉⵙⵓⵖⴰⴷ.
ⴰⵏⵙⴰ ⴰⵎⵓⵟⵟⵓⵏ :
ⴰⴷ ⵜⴻⵜⵜⵉⵢⵣⵉⵏⵜ ⵜⵣⵔⴰⵡⵉⵏ ⵉ : ueci.agadir@gmail.com
ⵜⴰⵙⴷⴰⵡⵉⵜ ⵏ ⵓⵏⴱⴷⵓ ⵔⴰⴷ ⵜⵃⵉⵢⵢⵍ ⵜⵉⵔⵎⵜ ⴷ ⵓⵣⴷⴷⵓⵖ ⵉ ⵉⵎⴷⵔⴰⵡⵏ ⵖ ⵓⵙⵙⴰⵏ ⵏ ⵜⵉⵏⴰⵡⵜ ⵜⴰⴳⵔⴰⵖⵍⴰⵏⵜ, ⴷ ⵔⴰⴷ ⴷ ⵜⵙⵙⵓⴼⵖ ⵖ ⵜⵥⵕⵉⴳⵉⵏ ⵏⵏⵙ ⵜⵉⵡⵓⵔⵉⵡⵉⵏ ⵏ ⵜⵉⵏⴰⵡⵜ ⴰⴷ.
ⵜⴰⵢⵎⵓⵏⵜ ⵜⴰⵎⴰⵙⵙⴰⵏⵜ :
ⵕⴰⵛⵉⴷ ⵍⵃⴰⵃⵉ
ⵎⵓⵃⵎⵎⴰⴷ ⵙⴳⵏⴼⵍ
ⵛⴰⴷⵉⵢⴰ ⴷⴷⵔⵇⴰⵡⵉ
ⵎⵓⵃⵎⵎⴰⴷ ⴱⵍⵉⵍⵉⴹ
ⵍⵃⵙⵏ ⵏⴰⵛⴼ
ⵄⵉⵢⵢⴰⴷ ⴰⵍⵃⵢⴰⵏ
ⵄⴱⴷ ⵍⵄⵣⵉⵣ ⴱⵍⵉⵍⵉⴹ
ⵜⴰⵢⵎⵓⵏⵜ ⵏ ⵓⵙⵏⵎⵉⵍⵉ :
ⵎⵓⵃⵎⵎⴰⴷ ⵊⴰⵡⵀⴰⵔⵉ
ⵎⴰⵍⵉⴽⴰ ⴱⵓⵟⴰⵍⴱ
ⵊⴰⵎⵄ ⴼⴰⵕⴹⵉ
ⵎⵓⵕⴰⴷ ⵏⴰⵛⴼ
ⴼⴰⵟⵉⵎⴰ ⵣⵄⵄⴰⴼ
ⵃⴰⵙⴰⵏ ⴱⵍⵍⵢⴰⵣⵉⴷ
ⵍⵃⵙⵏ ⴰⵛⵃⴰⵢⴼⵉ
ⵄⵉⵛⴰ ⴼⵉⴽⵔⵉ.

ⴰⵍⵖⵓ ⵏ ⵓⵅⵏⵎⵉⵍ ⵏ ⵓⴱⵔⴰⴳⵔⴰⵡ ⵡⵉⵙⵙ 13

ⴰⵍⵖⵓ ⵏ ⵓⵅⵏⵎⵉⵍ ⵏ ⵓⴱⵔⴰⴳⵔⴰⵡ ⵡⵉⵙⵙ 13

ⵙ ⵓⴹⴼⵕ ⵏ ⴰⵢⵍⵍⵉ ⴷ ⵉⵍⵍⴰⵏ ⴳ ⵓⵙⵍⴳⵏ ⴰⴷⵙⵍⴰⵏ ⵏ ⵜⵙⴷⴰⵡⵉⵜ ⵏ ⵓⵏⴱⴷⵓ ⵏⴳ ⵓⴳⴰⴷⵉⵔ, ⴷ ⵉⵏⵇⵇⵉⵙⵏ ⵏ ⵉⵏⴳⵎⴰⵎⵏ ⵏⵏⵙ ⴷ ⵓⴱⵔⵉⴷ ⵏ ⵓⵙⵔⵙⵍ ⵍⵍⵉ ⵖ ⵜⵣⵣⵉⴳⵣ, ⴰⵔ ⵉⵙⵎⴰⵍ ⵓⵎⴰⵔⵉⵙ ⵏ ⵜⵙⴷⴰⵡⵉⵜ ⵏ ⵓⵏⴱⴷⵓ ⴷ ⵓⵙⵇⵇⵉⵎ ⵏⵏⵙ ⴰⵎⵙⵙⵓⴳⵓⵔ ⴷ ⵜⴰⵢⵎⵓⵏⵜ ⵏ ⵓⵃⵉⵢⵢⵍ ⵎⴰ ⵙ ⵔⴰⴷ ⵜⵙⵏⵎⵉⵍⵉ ⴰⴱⵔⴰⴳⵔⴰⵡ ⵏⵏⵙ ⵡⵉⵙⵙ 13, ⵙ ⵜⵎⴰⵜⴰⵔⵜ ⵏ : « ⴰⵙⵎⵀⵍ ⴰⵎⵙⵜⴳⴳⴰⵔ ⵏ ⵓⵙⵙⵏⵚⴱ ⴰⴷⵙⵜⴰⵔ ⵏ ⵜⵎⴰⵣⵉⵖⵜ, ⵜⵓⵜⵍⴰⵢⵜ ⴷ ⵜⴷⵍⵙⴰ ⴷ ⵜⵎⴰⴳⵉⵜ, ⴷ ⴰⵙⴰⴷⴼ ⴰⴷⵙⵍⴰⵏ ⵏ ⵓⵙⵓⴷⵙ ⵏ ⵓⵡⴰⵏⴽ ⵏ ⵜⴷⵉⵎⵓⵇⵕⴰⵜⵉⵜ ⴷ ⵜⵎⵔⵙⴰⵍ », ⴳ ⵡⴰⵙⵙ ⵏ ⵓⵚⵉⵚⵢⴰⵙ 29 ⴰⴱⵔⵉⵍ 2023, ⵙⴳ ⵜⵉⵣⵉ ⵜⵉⵙⵙ 15:00 ⵏ ⵜⴷⴳⴳⵯⴰⵜ ⵖ ⵓⵣⴷⴷⵓⵖ ⵏ ⵜⵎⵙⵎⵓⵏⵜ ⵉⵍⵉⵖ ⴳ ⵓⴳⴰⴷⵉⵔ. ⵉⴳⴰ ⵓⵍⵖⵓ ⴰⴷ ⵜⴰⵙⵖⵔⴰⵜ ⵉ ⴽⵓ ⵎⵍⵜⴰⵖⵏ ⴷ ⵜⵎⵍⵜⴰⵖⵉⵏ ⵏ ⵉⵎⴷⵔⴰⵡⵏ ⵏ ⵜⵎⵙⵎⵓⵏⵉⵏ ⴷ ⵜⵎⵔⵙⴰⵍ ⵍⵍⵉ ⴷⵉⵙ ⵉⴷⵔⴰⵏ ⵉⵡⵜⵜⴰⵙⵏ ⴷ ⵉⵏⵖⵎⴰⵙⵏ ⴼⴰⴷ ⴰⴷ ⵏⵏ ⴰⵛⴽⵏ ⴳ ⵜⵡⵓⵔⵉⵡⵉⵏ ⵏ ⵓⴱⵔⴰⴳⵔⴰⵡ.

ⴰⵙⴳⵎⴹ :
ⴰⵏⵙⵙⵉⵅⴼ : ⵕⴰⵛⵉⴷ ⵍⵃⴰⵃⵉ.

ⴰⵍⵖⵓ ⵏ ⵓⴳⵔⴰⵡ ⵏ ⵓⵙⵇⵇⵉⵎ ⴰⵏⵎⵀⴰⵍ

ⴰⵍⵖⵓ ⵏ ⵓⴳⵔⴰⵡ ⵏ ⵓⵙⵇⵇⵉⵎ ⴰⵏⵎⵀⴰⵍ

ⴰⵍⵖⵓ
ⵉⵙⴽⵔ ⵓⵎⴰⵔⵉⵙ ⴰⵏⵎⵀⴰⵍ ⵏ ⵜⵙⴷⴰⵡⵉⵜ ⵏ ⵓⵏⴱⴷⵓ ⴳ ⵓⴳⴰⴷⵉⵔ ⴰⴳⵔⴰⵡ ⵏⵏⵙ ⴰⵙⵙ ⵏ 4 ⴱⵕⴰⵢⵕ 2023, ⵍⴽⵍⵍⵉ ⵉⵙⴽⵔ ⴰⵡⴷ ⵓⵙⵇⵇⵉⵎ ⴰⴼⵉⴷⵉⵕⴰⵍ ⴰⴳⵔⴰⵡ ⵏⵏⵙ ⴰⵎⴳⴳⴰⵔⵓ ⴰⵙⵙ ⵏ 17 ⴱⵕⴰⵢⵕ 2023, ⵖ ⵙⵉⵏ ⵉⴳⵔⴰⵡⵏ ⴰⴷ ⵉⵜⵜⵓⵢⵙⴽⴰⵔ ⵓⵎⵙⴳⴷⴰⵍ ⵅⴼ ⴽⵓ ⵉⵏⵇⵇⵉⵙⵏ ⵉⵙⴽⵍⴰⵏⵏ ⵙ ⵉⵏⵎⵙⵙⵓⴳⵓⵔⵏ ⴷ ⵡⵉⵏ ⵜⴷⵔⵉⵎⵜ ⵏ ⵜⵉⵣⵉ ⵉⵣⵔⵉⵏ ⵏⴳⵔ ⵎⴰⵕⵚ 2020 ⴰⵔ ⴱⵕⴰⵢⵕ 2023, ⵉⵎⵙⴰⵙⴰ ⴷ ⴼⵍⵍⴰⵙ ⵓⵙⵇⵇⵉⵎ ⴰⵏⵎⵀⴰⵍ ⵙ ⴽⵓ ⵉⴳⵎⴰⵎⵏ ⵏⵏⵙ, ⵖ ⵜⴳⵉⵔⴰ ⵏ ⵓⴳⵔⴰⵡ ⴰⵔ ⵉⵙⵎⴰⵍ ⵓⵎⴰⵔⵉⵙ ⴷ ⵓⵙⵇⵇⵉⵎ ⴰⴼⵉⴷⵉⵕⴰⵍ ⵉ ⴽⵓ ⵉⵎⵍⵜⴰⵖⵏ ⴷ ⵉⵎⴹⴼⴰⵕⵏ ⵏ ⵜⵡⵓⵔⵉⵡⵉⵏ ⵏ ⵜⵉⵍⴰⵍ ⵏ ⵜⵙⴷⵡⴰⵉⵜ ⵏ ⵓⵏⴱⴷⵓ ⵎⴰ ⴰⴷ :
ⵉⵙⵜⵉ ⵓⵙⵇⵇⵉⵎ ⴷ ⵓⵎⴰⵔⵉⵙ ⴰⴼⵉⴷⵉⵕⴰⵍ ⵙⴳ ⵎⴰⴷ ⵉⵜⵜⵓⵡⵙⵎⴰⴳⵍⴽ ⵙ ⵜⵎⴰⵙⴰⵢⵜ ⵏ ⵓⵙⵡⵓⴷⴷⵓ ⵏ ⵜⵙⴷⴰⵡⵉⵜ ⵏ ⵓⵏⴱⴷⵓ ⵢⴰⵏ ⵓⵣⵡⵍ ⵉ ⵓⵚⵏⴼⴰⵕ ⵏⵏⵙ ⴷ ⵓⵖⴰⵡⴰⵙ ⵏⵏⵙ ⵍⵍⵉ ⵜ ⵉⴳⴰⵏ ⴷ « ⵜⵓⴳⴳⴰⵙ ⵅⴼ ⵓⵙⵔⵙⵍ ⵏ ⵜⵙⴷⴰⵡⵉⵜ ⵏ ⵓⵏⴱⴷⵓ », ⵉⵜⵜⵓⵡⵙⴽⴰⵔ ⵎⴰ ⴰⵏⵏ ⵙ :
 ⴰⵙⵔⵙⵍ ⵏ ⵓⵙⵡⵓⴷⴷⵓ ⴰⵥⵕⴼⴰⵏ :
– ⵜⴻⵜⵜⵢⵙⴽⴰⵔ ⵢⴰⵜ ⵜⴰⵢⵎⵓⵏⵜ ⵉⵥⵍⵉⵏ ⵙ ⵜⴷⵔⵉⵎⵜ ⵜⵙⴽⵔⵜ ⵓⴳⴳⴰⵔ ⵏ 15 ⵏ ⵓⴳⵔⴰⵡ ⴷ ⵓⵍⵎⵓⵇⵇⴰⵔ, ⵜⵥⵍⵉ ⴳⵉⵙ ⵜⵉⵡⵓⵔⵉⵡⵉⵏ ⵏ ⵓⵙⵡⵓⴷⴷⵓ ⴷ ⵉⵎⵙⴰⵙⴰⵏ ⵉⵙⵍⴳⵏⵏ ⴷ ⵉⵍⵓⴳⴰⵏⵏ ⵍⵍⵉ ⵅⴼ ⴰⵔ ⵉⵜⵜⵙⵓⵔ ⵓⵙⵡⵓⴷⴷⵓ ⴰⵥⵕⴼⴰⵏ ⵏ ⵜⵎⵙⵎⵓⵏⵉⵏ ⵜⵙⵡⵓⵔⵉ ⵙⵉⵙⵏⵜ ⵖ ⴽⵕⴰⴹ ⵉⵙⴳⴳⵯⴰⵙⵏ ⴰⴷ.
– ⴰⵙⴳⴳⴷ ⴷ ⵓⵣⵔⴰⵢ ⵏ ⵡⴰⴷⴷⴰⴷ ⵏ ⵓⵙⵡⵓⴷⴷⵓ ⴰⵥⵕⴼⴰⵏ ⵏ ⵉⵙⴳⴳⵯⴰⵙⵏ ⵍⵍⵉ ⵉⵣⵔⵉⵏ ⴷ ⵓⵙⵔⵙⵍ ⵏ ⵡⴰⴷⴷⴰⴷ ⵏⵏⵙ ⴷ ⵉⵎⴷⵔⴰⵡⵏ ⴷ ⵜⵎⵔⵙⴰⵍ, ⵍⵍⵉⵖ ⴰⵔ ⵜⴰⴽⴽⴰ ⵉ ⵉⵎⴷⵔⴰⵡⵏ ⵏⵏⵙ ⵉⵏⵇⵇⵉⵙⵏ ⵉⵙⴽⵍⴰⵏⵏ ⴷ ⵡⵉⵏ ⵜⴷⵔⵉⵎⵜ ⵏ ⵉⵚⵏⴼⴰⵕ ⵍⵍⵉ ⵉⵜⵜⵓⵢⵙⴽⴰⵔⵏ ⴷ ⵎⴰⵏⵉ ⵜⵙⵓⴽⴰ ⴰⵙⵙⵥⵕⴼ ⵏⵏⴰ ⵉⵜⵜⵓⵢⴼⴽⴰⵏ ⵉ ⵉⵚⵏⴼⴰⵕⵏ ⴰⴷ. ⴷ ⴰⵔ ⵜⴰⴽⴽⴰ ⵜⵓⵔⴰⴳⵉⵏ ⵉⵙⵓⵔⵏ ⵅⴼ ⵉⵙⵍⴳⵏⵏ ⵉⵥⵍⵉ ⵙ ⵓⵙⵡⵓⴷⴷⵓ ⴰⵥⵕⴼⴰⵏ ⴷ ⵡⴰⵏⵏⴰⵍ ⴰⴳⴷⵓⴷⴰⵏ ⵉ ⵜⵎⵙⵙⵓⴳⵓⵔⵜ ⵏ ⵉⵔⴳⴰⵢⵏ ⴷ ⵓⵙⵇⵇⵉⵎ ⴰⵏⵎⵏⴰⴹ ⵏ ⵉⵙⵉⵟⵟⵏⵏ.
 ⴰⵙⵔⵙⵍ ⵏ ⵓⵙⵡⵓⴷⴷⵓ ⴰⵎⵙⵙⵓⴳⵓⵔ ⴷ ⵡⵓⵏ ⵓⵏⵢⴰⵍⴽⴰⵎ :
– ⴰⵔ ⵏⵙⵙⵎⵔⴰⵙ ⴰⵎⵙⴳⴷⴰⵍ ⴷ ⵓⵙⵡⵓⴷⴷⵓ ⴰⴷⵉⵎⵓⵇⵔⴰⵜⵉ ⵉⴼⴰⵡⵏ ⵖ ⵓⵎⴰⵔⵉⵙ ⵖ ⵓⵙⵖⵉⵡⵙ ⴷ ⵓⵙⵡⵓⴷⴷⵓ ⵏ ⵜⴷⵔⵉⵎⵜ, ⴷ ⴰⵔ ⵏⵙⴽⴰⵔ ⵉⴳⵔⴰⵡⵏ ⵏ ⵓⵎⴰⵔⵉⵙ ⴷ ⵡⵉⵏ ⵓⵙⵇⵇⵉⵎ ⴰⵏⵎⵀⴰⵍ ⵙ ⵉⵏⵎⴰⵍⴰⵏ ⴷ ⴰⵔ ⴳⵉⵙ ⵉⵜⵜⵉⵍⵉ ⵓⵙⵎⵏⵉⴷ ⵏ ⵡⴰⴷⴷⴰⴷ ⴰⵥⵔⴼⴰⵏ ⴷ ⵓⵏⵎⵀⴰⵍ ⴷ ⵓⵎⵙⵙⵓⴳⵓⵔ ⵏ ⵜⵎⵙⵎⵓⵏⵜ, ⴷ ⵜⴻⵜⵜⵓⵡⵙⵎⵀⵍⵏⵜ ⵜⵎⴰⵙⴰⵢⵉⵏ ⵏ ⵜⴰⵢⵎⵓⵏⵉⵏ, ⵉⵜⵜⵓⵢⵙⴽⴰⵔ ⵎⴰ ⵉⵜⴳⴳⴰⵏ 13 ⵏ ⵓⴳⵔⴰⵡ ⵏ ⵓⵎⴰⵔⵉⵙ, ⴷ 6 ⵉⴳⵔⴰⵡⵏ ⵏ ⵓⵙⵇⵇⵉⵎ ⴰⵏⵎⵀⴰⵍ, ⵍⴽⵎⵏ ⵉⵍⵎⵓⵇⵇⴰⵔⵏ ⴷ ⵉⴳⵔⴰⵡⵏ ⵏ ⵜⴰⵢⵎⵓⵏⵉⵏ ⵓⴳⴳⴰⵔ ⵏ 27.
– ⵜⴻⵜⵜⵓⵡⵙⴽⴰⵔ ⵢⴰⵜ ⵜⴰⵢⵎⵓⵏⵜ ⵉⵥⵍⵉⵏ ⵙ ⵓⵙⵏⵖⵎⵙ ⴷ ⵓⵙⵉⵜⵜⴳ ⵏ ⵓⵎⵙⴰⵡⴰⴹ, ⵜⴱⵉⴷⴷ ⵅⴼ ⵜⵓⵚⴽⴰ ⴷ ⵜⵎⵙⴷⴰⴳⵜ ⵏ ⵜⴳⴳⵓⵔⵜ ⵜⴰⵎⵓⵟⵟⵓⵏⵜ ⵏ ⵜⵙⴷⴰⵡⵉⵜ ⵏ ⵓⵏⴱⴷⵓ ⵙ ⴽⵕⴰⴹⵜ ⵜⵓⵜⵍⴰⵢⵉⵏ (ⵜⴰⵎⴰⵣⵉⵖⵜ – ⵜⴰⵄⵕⴰⴱⵜ – ⵜⴰⴼⵕⴰⵏⵚⵉⵚⵜ) ⴳⵉⵙ ⵢⴰⵏ ⵓⴳⵣⵣⵓⵎ ⵖ ⵡⴰⵔⵛⵉⴼ ⵏ ⵜⵙⴷⴰⵡⵉⵜ ⴷ ⵜⵡⵓⵔⵉⵡⵉⵏ ⵏ ⵜⵉⵏⴰⵡⵉⵏ ⵏⵏⵙ ⵜⵉⴳⵔⴰⵖⵍⴰⵏⵉⵏ ⴷ ⵜⵓⴳⵜⵜ ⵏ ⵜⵉⵏⴰⵡⵉⵏ ⵏⵏⵙ ⴷ ⵉⵎⵓⵙⵙⵜⵏⴱ ⵏⵏⵙ ⵢⴰⴹⵏⵉⵏ. ⵜⴻⵜⵜⵓⵚⴽⴰ ⴰⵡⴷ ⵜⴰⵙⵏⴰ ⵜⵓⵏⵙⵉⴱⵜ ⵖ ⵓⴼⴰⵢⵙⴱⵓⴽ ⴷ ⵜⴱⴰⴷⵓⵜ ⵏ ⵜⵙⴷⴰⵡⵉⵜ ⵖ ⵢⵓⵜⵓⴱ, ⴰⵔ ⴳⵉⵙ ⵜⵜⵉⵍⵉⵏ ⴽⵓ ⵉⵎⵓⵙⵙⵓⵜⵏ ⴷ ⵜⵡⵓⵔⵉⵡⵉⵏ ⴷ ⵜⵥⵕⵉⴳⵉⵏ ⵏ ⵜⵙⴷⴰⵡⵉⵜ ⵏ ⵓⵏⴱⴷⵓ, ⵜⵉⵏ ⵜⵉⵍⵉⵜ ⵓⵍⴰ ⵜⵉⵏ ⵜⵓⴳⴳⵓⴳⵜ, ⵜⵣⴷⵉ ⴰⵡⴷ ⴷ ⵜⴳⴳⵓⵔⵜ ⵜⴰⵎⵓⵟⵟⵓⵏⵜ, ⵎⴽⵍⵍⵉ ⵏⵎⵎⴰⵖ ⴼⴰⴷ ⴰⴷ ⵙⴽⵔⵏ ⵉⵎⵓⵙⵙⵓⵜⵏ ⵏ ⵜⵙⴷⴰⵡⵉⵜ ⵏ ⵓⵏⴱⴷⵓ ⴷ ⵜⵉⵏⴰⵡⵉⵏ ⵏⵏⵙ ⴷ ⵓⵙⵙⴰⵏ ⵏⵏⵙ ⵉⵣⵔⴰⵡⴰⵏⵏ ⴰⴷⵖⴰⵔ ⵏⵏⵙⵏ ⵖ ⴽⵓ ⵉⵏⵙⴰⵜⵏ ⵏ ⵓⵙⵏⵖⵎⵙ ⵉⵏⴰⵎⵓⵔⵓⵏ, ⵡⵉⴷ ⵉⵜⵢⵔⴰⵏ ⵓⵍⴰ ⵡⵉⵏ ⵓⵙⵍⵉⵥⵉⵕ.
– ⵜⵓⵜⵜⵓⵙⴽⴰⵔ ⵜⴰⵢⵎⵓⵏⵜ ⵉⵥⵍⵉⵏ ⵙ ⵡⴰⴳⵍⴰ ⴷ ⵡⴰⵔⵛⵉⴼ, ⵜⴰⵍⵍⵉ ⵉⵥⴹⴰⵕⵏ ⴰⴷ ⵜⵙⵎⵓⵏ ⵜⵉⵥⵕⵉⴳⵉⵏ ⵏ ⵜⵙⴷⴰⵡⵉⵜ ⵏ ⵓⵏⴱⴷⵓ, ⵙⵍⴰⵡⴰⵏ ⴰⴽⴽⵯ ⵉⴷⵍⵉⵙⵏ ⴷ ⵜⵡⵓⵔⵉⵡⵉⵏ ⵏ ⵜⵉⵏⴰⵡⵉⵏ ⵜⵉⴳⵔⴰⵖⵍⴰⵏⵉⵏ ⵍⵍⵉ ⵉⵜⵜⵓⵙⵏⵎⴰⵍⴰⵏ ⵖ ⵎⴰ ⵉⵜⵜⴳⴳⴰⵏ ⵓⴳⴳⴰⵔ ⵏ 40 ⵏ ⵉⵙⴳⴳⵯⴰⵙⵏ, ⴷ ⵢⴰⵏ ⵓⴳⵣⵣⵓⵏ ⵖ ⵡⴰⵔⵛⵉⴼ ⵏⵏⵙ.
– ⵜⵣⵜⵜⵓⵙⴽⴰⵔ ⵢⴰⵜ ⵜⴰⵢⵎⵓⵏⵜ ⵉⵥⵍⵉⵏ ⵙ ⵓⵃⵉⵢⵢⵍ ⵏ ⵓⵚⵏⴼⴰⵔ ⵏ ⵜⴰⵏⴼⴰ ⵜⴰⴳⴷⵓⴷⴰⵏⵜ, ⵜⵣⵣⵔⵉ, ⵜⵙⵔⵙ ⴰⵢⵍⵍⵉ ⴷ ⵉⵇⵇⴰⵏⵏ ⵏ ⵉⵙⵡⵓⴷⴷⵓⵜⵏ ⵓⵍⴳⵉⵏⵏ, ⵜⵙⵎⴷ ⴼ ⵜⵡⵓⵔⵉ ⵏⵏⵙ ⴼⴰⴷ ⴰⴷ ⵜⵍⴽⵎ ⴰⵡⵜⵜⴰⵙ ⴰⵏⵏ ⵖ ⵎⴰⴷ ⴷ ⵢⵓⵛⴽⴰⵏ.
– ⵜⴻⵜⵜⵓⵙⴽⴰⵔ ⵜⴰⵢⵎⵓⵏⵜ ⵉⵥⵍⵉⵏ ⵙ ⵓⵣⴷⴷⵓⵖ, ⵜⵙⵔⵙ ⵜⴰⵏⵏⴰⵢⵉⵏ ⵏⵏⵙ ⴷ ⵉⵎⵏⴰⴷⵏ ⵏⵏⵙ ⵜⵙⴽⵔ ⵜⵓⴳⵜⵜ ⵏ ⵉⵏⵢⴰⵍⴽⴰⵎ, ⴼⴰⴷ ⴰⴷ ⵢⵉⵍⵉ ⵓⵣⴷⴷⵓⵖ ⵏ ⵜⵎⵙⵎⵓⵏⵜ ⵖ ⵎⴰⴷ ⴷ ⵢⵓⵛⴽⴰⵏ, ⵜⵣⵎⵔ ⴰⴷ ⵜⴼⵓⴽⴽⵓ ⴰⵎⵓⴽⵔⵉⵙ ⴰⵏⵏ ⵖ ⵜⵉⵣⵉ ⴰⴷ.
 ⴽⵓ ⵉⵎⵓⵙⵙⵓⵜⵏ ⵉⵜⵜⵓⵢⵙⴽⴰⵔⵏ ⵖ ⴽⵕⴰⴹ ⵉⵙⴳⴳⵯⴰⵙⵏ ⴰⴷ ⵣⵔⵉⵏⵉⵏ :
– ⵎⵇⵇⴰⵔ ⵉⵎⵎⵔⴰ ⵡⴰⴷⴷⴰⴷ ⵍⵍⵉⵖ ⵢⵓⵎⵥ ⵓⵎⴰⵔⵉⵙ ⴷ ⵓⵙⵇⵇⵉⵎ ⴰⵏⵎⵀⴰⵍ ⴰⴷ ⵜⴰⵎⴰⵙⴰⵢⵜ ⵏ ⵓⵙⵡⵓⴷⴷⵓ ⵏ ⵜⵙⴷⴰⵡⵉⵜ ⵏ ⵓⵏⴱⴷⵓ, ⴰⴷⴷⴰⴷ ⵍⵍⵉ ⵉⵎⵎⵔⴰⵏ ⵓⴳⴳⴰⵔ ⵙ ⵓⵙⵔⴰⴳ ⵏ ⵉⵙⴳⴳⵯⴰⵙⵏ ⵏ ⵓⵥⵍⴰⵢ ⴰⴷⵓⵙⴰⵏ ⵎⴰⵔ ⴰⴱⴰⵢⵢⵓⵕ ⵏ ⴽⴼⵉⴷ 13, ⵜⵥⴹⴰⵕ ⵜⵙⴷⴰⵡⵉⵜ ⵏ ⵓⵏⴱⴷⵓ ⴰⴷ ⵜⵙⵔⵙⵔ ⵜⵙⴽⵔ ⵉⵖⴰⵡⴰⵙⵏ ⵎⵇⵇⵓⵔⵏⵉⵏ ⵖ ⴽⵕⴰⴹ ⵉⵙⴳⴳⵯⴰⵙ, ⵖ ⵓⴳⴰⴷⵉⵔ ⵓⵍⴰ ⵜⵉⵖⵔⵎⵉⵏ ⵢⴰⴹⵏⵉ ⵏ ⵜⵎⵏⴰⴹⵜ, ⵍⵍⵉⵖ ⵜⵙⴽⵔ ⵎⴰ ⵉⵜⵜⴳⴳⴰⵏ 49 ⵏ ⵓⵎⵓⵙⵙⵓ ⵖ ⴳⴰⵏ ⵜⵉⵏⴰⵡⵉⵏ ⵜⵉⴳⵔⴰⵖⵍⴰⵏⵉⵏ ⴷ ⵜⵏⴰⵎⵓⵔⵉⵏ ⴷ ⵓⵙⵙⴰⵏ ⵉⵣⵔⴰⵡⴰⵏⵏ ⴷ ⵉⵍⵎⵓⵇⵇⴰⵔⵏ ⵏ ⵓⵙⵏⴼⵍⵓⵍ, ⵖ ⵎⴰⴷ ⵉⵜⵜⴳⴳⴰⵏ ⵢⴰⵏ ⵓⵎⵓⵙⵙⵓ ⵖ ⴽⵓ 20 ⵏ ⵡⴰⵙⵙ, ⵎⴽⵍⵍⵉ ⴳⵉⵙⵏ ⴷⵔⴰⵏ 251 ⵏ ⵓⵔⵣⵓ ⴷ ⵜⵎⵔⵣⵓⵜ ⴷ ⵓⵎⵙⵏⴼⵍⵓⵍ ⴷ ⵜⵎⵙⵏⴼⵍⵓⵍⵜ ⴷ ⵉⵎⵙⴽⴰⵔⵏ ⵓⵖⵔⵉⵎⵏ ⴷ ⵉⵎⵖⵏⴰⵙⵏ ⵅⴼ ⵉⵣⵔⴼⴰⵏ :

ⵓⵟⵟⵓⵏ ⵏ ⵉⵎⵓⵙⵙⵓⵜⵏ ⵉⴷⵍⵙⴰⵏⵏ ⴷ ⵉⵎⴰⵙⵙⴰⵏⵏ ⴷ ⵡⵉⵏ ⵜⵥⵓⵕⵉ : 49
ⵓⵟⵟⵓⵏ ⵏ ⵉⵎⴷⵔⴰⵡⵏ :
ⵜⴰⵎⵓⵜⵜⵔⵜ 2020 2021 2022 ⵉⵙⴳⴳⵯⴰⵙⵏ
104 43 13 48 ⵉⵎⵔⵣⵓⵜⵏ ⴷ ⵜⵎⵔⵣⵓⵜⵉⵏ
98 48 6 44 ⵉⵏⴰⵥⵓⵕⵏ ⴷ ⵉⵎⵙⵏⴼⵍⵓⵍⵏ
49 21 7 21 ⵉⵎⵖⵏⴰⵙⵏ ⵓⵖⵔⵉⵎⵏ ⴷ ⵡⵉⵏ ⵉⵣⵔⴼⴰⵏ
251 ⵜⴰⵎⵓⵜⵜⵔⵜ

ⵓⵟⵟⵓⵏ ⴷ ⵜⴳⵎⵉⴹⵉ ⵏ ⵜⵎⵖⴰⵔⵉⵏ : 50, 20 %
ⵓⵟⵟⵓⵏ ⴷ ⵜⴳⵎⵉⴹⵉ ⵏ ⵉⵄⵔⵔⵉⵎⵏ : 81. 33 %
ⴰⴳⴰⴷⵉⵔ ⴰⵙⵙ ⵏ : 17 ⴱⵕⴰⵢⵕ 2023

ⴰⵙⴳⵎⴹ :
ⵙⴳ ⴰⵎⴰⵔⵉⵙ ⴷ ⵓⵙⵇⵇⵉⵎ ⴰⵏⵎⵀⴰⵍ :
ⴰⵏⵙⵙⵉⵅⴼ : ⵕⴰⵛⵉⴷ ⵍⵃⴰⵃⵉ


ⵅⴼ ⵜⵙⵓⵜⵍⵜ ⵜⵉⵙⵙ ⵙⵏⴰⵜ ⵏ ⵉⵍⵎⵓⵇⵇⴰⵔⵏ ⵏ ” ⴰⵙⵜⴰⵔⴰ” ⵉ ⵡⴰⵏⵏⴰⵍ ⵏ ⵜⵖⵔⵉ ⴷ ⵡⵓⴹⵓⴼ.

ⵅⴼ ⵜⵙⵓⵜⵍⵜ ⵜⵉⵙⵙ ⵙⵏⴰⵜ ⵏ ⵉⵍⵎⵓⵇⵇⴰⵔⵏ ⵏ ” ⴰⵙⵜⴰⵔⴰ” ⵉ ⵡⴰⵏⵏⴰⵍ ⵏ ⵜⵖⵔⵉ ⴷ ⵡⵓⴹⵓⴼ.

ⴰⵍⵖⵓ ⴰⵖⵎⵙⴰⵏ
ⵅⴼ ⵜⵙⵓⵜⵍⵜ ⵜⵉⵙⵙ ⵙⵏⴰⵜ ⵏ ⵉⵍⵎⵓⵇⵇⴰⵔⵏ ⵏ ” ⴰⵙⵜⴰⵔⴰ” ⵉ ⵡⴰⵏⵏⴰⵍ ⵏ ⵜⵖⵔⵉ ⴷ ⵡⵓⴹⵓⴼ.
ⴰⵔ ⵜⵙⵏⵎⵉⵍⵉ ⵜⵙⴷⴰⵡⵉⵜ ⵏ ⵓⵏⴱⴷⵓ ⴳ ⵓⴳⴰⴷⵉⵔ, ⵙ ⵜⵡⵉⵙⵉ ⵏ ⵜⵎⴰⵡⵙⴰⵙⵜ ⵏ ⵜⵄⵄⵓⵔⵎⴰ ⴷ ⵜⴷⵍⵙⴰ ⴷ ⵓⵎⵢⴰⵡⴰⴹ – ⵉⴳⵔ ⵏ ⵜⴷⵍⵙⴰ -, ⵉⵍⵎⵓⵇⵇⴰⵔⵏ ⵏ “ⴰⵙⵜⴰⵔⴰ” ⵉ ⵜⵡⵉⵙⵉ ⵏ ⵏ ⵜⵖⵔⵉ ⴷ ⵡⵓⴹⵓⴼ ⵖ ⵜⵎⵏⴰⴹⵜ ⵏ ⵙⵓⵙ ⵎⴰⵙⵜ, ⴰⵙⵙ ⵏ 5 ⵏⵓⵡⴰⵏⴱⵉⵔ 2022, ⵖ ⵡⵓⴷⴷⵉⵙ ⴰⴷⵍⵙⴰⵏ ⵖ ⵜⵖⵔⵎⵜ ⵏ ⵟⴰⵟⴰ ⵙ ⵓⵎⵢⴰⵡⴰⵙ ⴷ ⵡⴰⵎⵎⴰⵙ ⵏ ⴱⴰⵏⵉ ⵉ ⵜⵣⵔⴰⵡⵉⵏ ⴷ ⵡⴰⵙⵙ ⵏ 12 ⵏⵓⵡⴰⵏⴱⵉⵔ 2022 ⵖ ⵜⴱⵕⵏⵉⴹⵜ ⴽⴰⴱⵕⵉⵙ ⴰⵎⴰⵣⵉⵖ ⵖ ⵜⵖⵔⵎⵜ ⵏ ⵓⴳⴰⴷⵉⵔ, ⵔⴰⴷ ⵢⵉⵍⵉ ⵖ ⵡⴰⵀⵉⵍ ⵏ ⵉⵍⵎⵓⵇⵇⴰⵔⵏ ⴰⴷ; ⴰⵙⴼⵙⵔ ⵉⵜⵜⵎⵓⵜⵜⵉⵢⵏ ⵏ ⵓⴷⵍⵉⵙ, ⵙⵏⴰⵜ ⵜⵉⵏⴰⵡⵉⵏ ⵅⴼ “ⵜⵉⵖⵔⵉ ⴷ ⵡⵓⴹⵓⴼ”, ⵜⴰⵏⴽⴷⴰ ⴷ ⵓⵙⴳⵎⴹ ⵏ ⵜⵥⵕⵉⴳⵉⵏ ⵏ ⵉⵎⵙⵏⴼⵍⵓⵍⵏ ⴷ ⵉⵎⴰⵔⴰⵜⵏ, ⴷ ⵢⴰⵏ ⵢⵉⵡⵉⵣⵏ ⵓⵥⴰⵡⴰⵏ ⴷ ⵜⴷⵢⴰⵣⵜ, ⵙ ⵜⴷⵔⴰⵡⵜ ⵏ 26 ⵏ ⵉⵎⵔⵣⵓⵜⵏ ⴷ ⵉⵎⵙⵏⴼⵍⵓⵍⵏ ⴷ ⵉⵎⴰⵔⴰⵜⵏ, ⵙ ⵓⴹⴼⵕ ⵏ ⵡⴰⵀⵉⵍ ⵉⵎⵓⵏⵏ ⴷ ⵓⵍⵖⵓ ⴰⴷ.
ⵟⴰⵟⴰ, ⵓⴷⴷⵉⵙ ⴰⴷⵍⵙⴰⵏ, ⴰⵚⵉⴹⵢⴰⵙ 5 ⵏⵓⵡⴰⵏⴱⵉⵔ 2022
ⴰⵀⵉⵍ
ⵜⴰⵙⵔⴰⴳⵜ ⵜⵉⵙⵙ 4 ⵏ ⵜⴷⴳⴳⵯⴰⵜ.
ⵜⵉⴳⵓⵔⵉⵡⵉⵏ ⵏ ⵓⵏⵏⵓⵕⵥⵎ
– ⵜⴰⵙⴷⴰⵡⵉⵜ ⵏ ⵓⵏⴱⴷⵓ
– ⴰⵎⵎⴰⵙ ⴱⴰⵏⵉ ⵉ ⵜⵣⵔⴰⵡⵉⵏ ⴷ ⵉⵔⵣⵣⵓⵜⵏ
– ⵜⴰⵎⵀⵍⴰ ⵜⴰⵙⴳⴰⵡⴰⵏⵜ ⵏ ⵜⵎⴰⵡⵙⴰⵙⵜ ⵏ ⵜⴷⵍⵙⴰ
– ⵜⵉⵏⴰⵡⵜ ⵅⴼ:
“ⵜⵉⵖⵔⵉ ⴷ ⵡⵓⴹⵓⴼ” , ⴷ ⵜⵏⴽⴷⴰ ⴷ ⵓⵙⴳⵎⴹ ⵏ ⵜⵥⵕⵉⴳⵉⵏ ⵏ ⵉⵎⵔⵣⵓⵜⵏ ⴷ ⵉⵎⵙⵏⴼⵍⵓⵍⵏ, ⵙ ⵜⴷⵔⴰⵡⵜ ⵏ:
– ⵍⵃⵙⵏ ⵣⴰⵀⵓⵔ, ⴰⵎⴰⵍⵍⴰⵙ ⴷ ⵓⵏⵙⵙⵉⵅⴼ ⵏ ⵜⵣⵍⵖⴰ ⵏ ⵜⵉⵔⵔⴰ ⵏ ⵉⵎⴰⵔⴰⵜⵏ ⵙ ⵜⵎⴰⵣⵉⵖⵜ.
– ⵄⴱⴷ ⵍⵎⵓⵟⵟⴰⵍⵉⴱ ⵣⵣⵉⵣⴰⵡⵉ, ⴰⵙⵍⵎⴰⴷ ⴰⵎⵔⵣⵓ ⴳ ⵜⵙⴽⵍⴰ ⵜⴰⵎⴰⵣⵉⵖⵜ.
– ⴱⵕⴰⵀⵉⵎ ⵓⴱⵍⵍⴰ: ⴰⵎⴷⵢⴰⵣ ⴷ ⵓⵎⵔⵣⵓ.
– ⵄⴱⴷⵔⵔⴰⵃⵎⴰⵏ ⵡⴰⴼⵉ ⵕⵕⴰⵃⵎⴰ: ⴰⵎⵔⵣⵓ
– ⵄⴱⴷ ⵚⵚⴰⴷⵇ ⵓⵃⵙⴰⵢⵏ: ⴰⵎⵣⵔⴰⵡ ⴰⵎⵔⵣⵓ.
ⵢⴰⵙⵉⵏ ⴰⴽⵏⵜⵓⵔ: ⴰⵎⵣⵔⴰⵡ ⴰⵎⵔⵣⵓ.
ⴰⵙⵡⵓⴷⴷⵓ: ⵎⵓⵃⵎⵎⴰⴷ ⴱⵍⵉⵍⴹ ⴰⵙⵍⵎⴰⴷ ⴰⵎⵔⵣⵓ.
ⵜⴰⵏⵇⵇⴰⵙⵜ : ⵉⵊⵊⵓ ⴰⵔⵊⴷⴰⵍ ⵜⴰⵎⵣⵔⴰⵡⵜ ⵜⴰⵎⵔⵣⵓⵜ.
ⴰⵙⴳⵎⴹ ⵏ ⵜⵥⵕⵉⴳⵉⵏ ⵏ ⵉⵎⴰⵔⴰⵜⵏ:
– ⵚⴰⵍⵃ ⴰⵢⵜ ⵚⴰⵍⵃ : ⴰⵏⴳⴳⴰⵍ
– ⵎⵓⵃⵎⵎⴰⴷ ⴱⵓⵃⵎⴷⵉ : ⴰⵏⴳⴳⴰⵍ
– ⴱⵓⵛⵕⴰ ⵍⴰⴷⵓⵣⵉ : ⵜⴰⵎⴰⵔⴰⵜ
– ⵎⵓⵃⵎⵎⴰⴷ ⵍⵡⴰⵇⵇⴰⵢⵏⵉ : ⴰⵎⴷⵢⴰⵣ
– ⵎⴰⵔⵢⴰⵎ ⵡⴰⴽⵔⵉⵎ : ⵜⴰⵎⴷⵢⴰⵣⵜ.
6 ⵏ ⵜⴷⴳⴳⵯⴰⵜ:
ⵉⵡⵉⵣ ⵏ ⵓⵥⴰⵡⴰⵏ ⴷ ⵜⴷⵢⴰⵣⵜ, ⵙ ⵜⴷⵔⴰⵡⵜ ⵏ :
ⵜⴰⵔⴰⴱⴱⵓⵜ ⵏ ⵓⵥⴰⵡⴰⵏ : “ⵓⵔⵜⴰⵏ”
ⴷ ⵉⵎⴷⵢⴰⵣⵏ:
– ⵍⵃⵓⵙⴰⵢⵏ ⴰⵊⴳⵓⵏ
– ⵎⵓⵃⵎⵎⴰⴷ ⵍⵎⵓⵃⴰⵎⵎⴰⴷⵉ
– ⵍⵀⴰⵛⵎ ⴰⵢⵜ ⵡⴰⵃⵎⴰⵏ
– ⵎⵓⵃⵎⵎⴰⴷ ⴰⴽⵓⵏⴰⴹ
– ⵎⴱⴰⵕⴽ ⵇⵍⵍⵓⵛ.
– ⵎⴰⵔⵢⴰⵎ ⵡⴰⴽⵔⵉⵎ.
-ⵎⵓⵃⵎⵎⴰⴷ ⵍⵡⴰⵇⵇⴰⵢⵏⵉ.
– ⵙⴰⵄⵉⴷ ⵍⵀⵉⵍⴰⵍⵉ.
– ⴱⵕⴰⵀⵉⵎ ⵓⴱⵍⵍⴰ.
ⴰⵙⴼⵙⵔ ⵏ ⵉⴷⵍⵉⵙⵏ: ⵜⵥⵕⵉⴳⵉⵏ ⵏ ⵜⵙⴷⴰⵡⵉⵜ ⵏ ⵓⵏⴱⴷⵓ ⴷ ⵜⵣⵍⵖⴰ ⵏ ⵜⵉⵔⵔⴰ ⴷ ⵡⴰⵎⵎⴰⵙ ⴱⴰⵏⵉ ⵄ ⵜⵣⵔⴰⵡⵉⵏ ⴷ ⵉⵔⵣⵣⵓⵜⵏ.

ⵜⴰⵙⵖⵔⴰⵜ

ⵜⴰⵙⵖⵔⴰⵜ

ⵉⴳⴰ ⵓⴷⴷⵓⵔ ⵉ ⵜⵎⵙⵎⵓⵏⵜ ⵜⴰⵙⴷⴰⵡⵉⵜ ⵏ ⵓⵏⴱⴷⵓ ⵖ ⵓⴳⴰⴷⵉⵔ, ⵙ ⵜⵎⵍⴷⴰ ⵏ ⵓⵙⴼⴼⵓⴳⵍⵓ ⵏⵏⵙ ⵙ ⵓⴽⵜⵜⴰⵢ « 30 ⵏ ⵓⵙⴳⴳⵯⴰⵙ ⵅⴼ ⵜⵏⵜⵜⴰⵎⵜ ⵏ ⵓⴳⴰⴷⵉⵔ ⵅⴼ ⵉⵣⵔⴼⴰⵏ ⵉⵙⵏⵉⵍⵙⵏ ⴷ ⵉⴷⵍⵙⴰⵏⵏ », ⴷ ⵓⵙⵏⵎⵉⵍⵍⵉ ⵏ ⵜⵙⵓⵜⵍⵜ ⵜⵉⵙⵙ 16 ⵏ ⵜⵉⵏⴰⵡⵜ ⵏⵏⵙ ⵜⴰⴳⵔⴰⵖⵍⴰⵏⵜ ⵅⴼ « ⵜⴰⵎⴰⴳⵉⵜ ⴷ ⵉⵙⵇⵙⵉⵜⵏ ⵏ ⵜⴷⵉⵎⵓⵇⵔⴰⵜⵉⵜ ⴷ ⵓⵙⵜⵔⴰⵔ » ⴰⴷ ⴰⵡⵏ ⵜⵖⵔ ⵙ ⵜⵖⵉⵎⵉⵜ ⵏ ⵓⵏⵏⵓⵕⵥⵎ ⴰⵙ ⵏ 14 ⵢⵓⵍⵢⵓⵣ 2022 ⵖ ⵜⵉⵣⵉ ⵜⵉⵙⵙ 4 ⵏ ⵜⴷⴳⴳⵯⴰⵜ ⵖ ⵜⴷⴰⵍⴰ ⵏ ⴱⵕⴰⵀⵉⵎ ⵕⴰⴹⵉ ⵖ ⵓⵣⴷⴷⵓⵖ ⵏ ⵜⴳⵔⴰⵡⵜ ⵏ ⵓⴳⴰⴷⵉⵔ, ⴷ ⵜⵡⵓⵔⵉⵡⵉⵏ ⵏ ⵓⵍⵎⵓⵇⵇⴰⵔ ⴰⴷ ⴰⵎⴰⵙⵙⴰⵏ ⴷ ⵓⴷⵍⵙⴰⵏ ⵎⴽ ⵍⵍⵉ ⵙ ⵍⵍⴰⵏⵜ ⵖ ⵡⴰⵀⵉⵍ ⵏⵏⵙ.